in

9 مصايد بتخلينا نبوظ الدايت وإزاي نتجنبها!

الخسسان مش حاجة سهلة، خاصة لما نبقى محاطين بظروف ومواقف مغرية جداً بتتحدَانا. إحنا عرفنالكو أكتر 9 مصايد إنتشاراً بتبوظلنا الدايت ولقينا الحل لكل مصيدة!

1. السينما

المشكلة: رحلتنا للسينما دافعها الأساسي هو إننا نتبسط! ولما نشوف كشك الفشار والشوكولاتة والحاجات المغرية دي قبل ما ندخل صعب نقاوم إلا لو إرادتنا عالية جداً. والبرغم من إن الفشار اللي من غير أي إضافات مفيد و صديق الدايت، إلا إنه في السينما بيبقى عليه إضافات تدمر أي دايت!

الحل: نحاول ناخد معانا أكل صحي للقزقزة زي فواكه مجففة أو نطلب فشار يكون معمول بزيت وملح فقط ونشير فيه مع صحابنا، وبكدة نعرف نستمتع بالفيلم بردو من غير ما نزيد في الوزن ولا نحس بحرمان

2.  في الشغل

المشكلة: المطبخ في الشغل كتير من الأحيان بيبقى فخ، سواء في عيد ميلاد حد من زملاءنا أو إجتماعات فيها مشاريب وحلويات محظورة، أو يوم قررت مجموعة تطلب دليفري، مواقف كلها بتضغط عالواحد!

الحل: دايماً ناخد معانا الأكل بتاعنا الصحي في الشغل ونخلي درج مخصص لينا حيسعفنا في كل موقف مغري نواجهه. وفوق كدة نعرف كل الناس في الشغل إننا عاملين دايت وبعد كام مرة هيبطلوا يعزموا أو يضغطو بأي إغراءات


3.  الحفلات

المشكلة: مشكلة الإحتفالات سواء كانت في بيت أو برة إن معظم الأكل بيبقى مليان دهون و سكريات وسعرات إحنا مانضمنهاش وبيبقى صعب ماناخدش على الأقل حتة بالذات لو حد عزم علينا

الحل: نحاول دايماً نختار أقل صنف ممكن يبقى دسم زي أي أصناف فيها خضار وسلطة ومشويات ونحاول نبعد عن المحمر والنشويات والحلويات (إلا لو كان فيه فاكهة). ممكن بردو ناخد معانا صنف صحي حلو منُو كرم ومنُو نضمن إننا حنعرف منبوظش الدايت!

4. الأكل قدام التليفزيون

المشكلة: أغلبيتنا بنحب ناكل وجباتنا قدام التلفزيون لكن في دراسات كتير بتقول إننا لما ناكل وإحنا ملهيين في حاجة ده بيخلينا ماناخدش بالنا إمتى بنشبع وبناكل أكتر ماحنا محتاجين

الحل: في سبيل إن إحنا نخس لازم نحاول نخلّي الأكل والتلفزيون نشاطين منفصلين، ونحاول نتفرج على حاجات بنَاءة تشغل مخنا عشان مانحتاجش نتسلى بالأكل وإحنا بنتفرج

5. الكوفي شوب

المشكلة: ساعات بنختار نتقابل في كافيه بدل مطعم عشان نشيل فكرة الوجبة من المابلة وبكدة هنشرب حاجة بس، لكن أنواع المشروبات في الكافيه مليانة سعرات مخفية في الكريمة واللبن كامل الدسم وإضافة السيرب والسكر، في الآخر بيبقى كأننا أكلنا حاجة حلوة ولا فرقت

الحل: منطلبش مشروبات فيها أي إضافات زي الإسبريسُو والقهوة التركي أو نطلب اللاتيه والكابوتشينو بلبن خالي الدسمى ومعلقة صغيرة سكر بني من غير ويبد كريم ولا سيرب

6. الساعة 3:25 ظهراً

المشكلة: في دراسات كتير بتقول إن المعاد دة بالتحديد خطير جداً في الدايت ولقوا إن 62% من الناس بيوصلوا لأقصى نقطة ضعف الساعة 3:25 الظهر قدام أي إغراءات!



الحل: نحافظ على مستوى طاقتا قرب الوقت ده بإننا ناكل سلطة مغذية أو شوربة خضار ودايماً يبقى متاح عندنا فواكه مجففة ناكلها لما نحس بالضعف

7. المطاعم

المشكلة: منيوهات المطاعم من أكتر الحاجات اللي بتتحدَانا إما مافيهاش أصناف للدايت أو أصناف الدايت اللي فيها ملينانة صوصات أو كريمة أوسكر أوسمنة بردو حتبوظلنا الدايت

الحل: نختار صنف فيه بروتين زي الفراخ أو السمك وجنبه خضار من غير أي صوص أو دريسينج، ونحاول منطلبش مع حد حاجة حلوة  وبدلها نشرب عصير فاكهة فريش من غير سكر

8. أوفرات السوبر ماركت

المشكلة: لما بنلاقي أوفر 2 بسعر 1 في السوبر ماركت بنتخيل إن ده حيوفرلنا وبنشتري منهم كتير، بس في الحقيقة اللي بيحصل إن طول ما في أكل أكتر عندنا في إحتمال كبير إننا ناكل أكتر ونخلصه في فترة أقصر ما كنَا متوقعين

الحل: ناخد الأوفر اللي على أنواع أكل مفيش مشكلة إننا ناكل منه أكتر ونسيب الحاجات الممكن تغرينا

9. الويك إند

المشكلة: معظمنا مبيلاقيش نفس الصعوبة في الدايت في أيام العمل أو الدراسة زي لما ييجي الويك إند حيث الخروج والراحة من الإلتزامات والقيود. بالرغم إن اليوم الفري مهم لكن لو كل ويك إند فري هنضيع كل المجهود اللي بذلناه

الحل: عشان نضمن إستمرارية الدايت وتجنب تدميره كل ويك إند لازم الدايت يكون متوازن، مغذي، و مشبع كفاية مش قاسي ومدينا إحساس دايم بالحرمان