in

9 حاجات لازم يتغسلوا قبل الأكل

في أكل كتير الناس بتاكله من غير غسيل وما يعرفوش ان ده ممكن يضر صحتهم ويسبب لهم أمراض كتير. هنا هنقولكم الأكل اللي لازم يتغسل قبل الأكل وأهمية غسله

1# الليمون والمانجا والأفوكادو

لازم  نغسل أي حاجة ليها قشر حتى لو هنقشرها، لإن القشرة بتبقى مليانة بكتيريا وجراثيم ومبيدات حشرية بتتنقل لإيدينا وللسكينة لو القشرة ما اتغسلتش الأول

2# الحبوب الكاملة

الحبوب  زي الرز والفريك والكينوا حتى لو هتتغلي في مياه او مرقة عشان نسوّيها، لازم قبلها تكون مغسولة كويس عشان نشيل منها أي نشا زيادة أو شوائب أو جراثيم


3# البطيخ والكانتلوب

قشر الكانتلوب والبطيخ ممكن يكون عليه بكتيريا السالمونيللا والليستيريا اللي ممكن تتنقل لنا لو قطعناهم من غير ما غسيل. لازم ندعك قشر الكانتلوب ونشطفه كويس قبل ما نقطعه عشان نحمي نفسنا من الأمراض

4# البقوليات المعلبة

البقوليات الجاهزة زي الفول والفاصوليا وغيرهم حلول كويسة لتوفير الوقت لكن لازم نصفيها من السائل اللي بتكون فيه لإنه مليان صوديوم، ونغسل البقوليات دي كويس بمياه باردة عشان نتخلص من الأملاح اللي فيها

5# أم الخلول (المحار)

أم الخلول وبلح البحر لازم يتغسلوا كويس جدا عشان نتخلص من كل الرملة وأي بقايا تانية عليهم قبل الأكل



6# الكانز وأزايز المياه وبرطمانات الأكل

أزايز المياه أو الكانز والبرطمانات بتعدي بأكتر من مرحلة شحن وتخزين وتتنقل من إيد لإيد لحد ما نشتريها، عشان كده الأحسن اننا نغسلها كويس قبل ما نستخدمها

7# الأعشاب الطازة (الخضرة الورق)

الأعشاب زي البقدونس والكزبرة والنعناع وغيرهم بيكون عليهم تراب وأحيانا بقايا طين، لازم يتغسلوا كويس قبل الاستخدام وقبل حتى ما يدخلوا التلاجة

8# الخضار والفاكهة

كلنا عارفين ان لازم نغسل الفاكهة والخضار قبل ما ناكلهم أو نطبخهم، لكن مينفعش نغسلهم بالصابون لإن قشرتهم ممكن تكون مسامية وتدخّل الصابون. نغسل الخضار أو الفاكهة كويس تحت مياه جارية وننشفهم بمناديل المطبخ

9# إيدينا

زي ما كل حاجة لازم تتغسل عشان نتخلص من البكتيريا والشوائب اللي فيها، لازم إيدينا كمان تتغسل كويس عشان ما تنقلش أي جراثيم للأكل اللي هناكله. نغسل إيدينا قبل ما نبدأ في تحضير الأكل وقبل ما ناكل بمياه دافية وصابون لـ30 ثانية على الأقل عشان نضمن نضافتهم