in

9 حاجات في مطبخك لازم ترميهم!

9 حاحات في مطبخك مفروض يترموا حالا!

مش هنتكلم عن الكراكيب، لكن في حاجات موجودة عندنا كلنا وبنستخدمهم كل يوم مع إنهم المفروض يترموا! اعرفوا سبب كل حاجة منهم عشان تعرفوا ليه لازم يترموا!

1# أزايز المياه البلاستك

الأزايز البلاستيك سواء بتاعة المياه أو العصير، كلها المفروض تستخدم مرة واحدة، نشرب اللي فيها ونرميها، مش نعيد استخدامها لفترات طويلة زي ما بيحصل! استخدامها الكتير فيه خطر على صحتنا لإنه بيخلي المواد الكيميائية اللي فيها تتسرب لنا مع الوقت.

2# سفنجة المواعين

سفنجة المواعين بتنضف المواعين كويس لكن في نفس الوقت بتلقط بكتيريا وبتحتفظ بيها، مفروض سفنجة المواعين تتغير كل أسبوع أو أسبوعين بالكتير عشان ما تنقلناش بكتيريا وتسبب لنا الأمراض.


3# الأكل البايت من مدة

الأكل البايت ليه مدة معينة في التلاجة وشروط تخزين كمان. أي أكل يقعد أكتر من مدته المحددة لازم نتخلص منه عشان صحتنا وعشان ما يأثرش على باقي الأكل. شوفوا كمان 23 أكلة ومدة صلاحيتهم في التلاجة والفريزر

4# باكتات الكاتشب والمايونيز

أغلب الناس بيحتفظوا بباكتات الكاتشب والمايونيز وأي صوص تاني لفترات طويلة وفي الغالب بتتنسي وتقعد أكتر من اللازم. المفروض نستخدم الباكتات دي أول بأول ونتأكد من تاريخ صلاحيتها باستمرار ونرمي أي باكتات قديمة منسية في التلاجة.

5# معالق التقليب البلاستيك

المعالق البلاستيك أو المطاط بتاعة التقليب من أدوات المطبخ اللي بنستخدمها تقريبا في كل حاجة. عشان كده لازم نخلي بالنا لو بدأت تشقق أو المطاط يتقشر، ساعتها لازم تترمي لإن المواد اللي فيها هتتسرب للأكل وتضر صحتنا.



6# المنظفات القديمة

المنظفات اللي بنستخدمها في تنضيف وتعقيم المطبخ وأدوات الأكل ليها فترة صلاحية، لو انتهت صلاحيتها المنظفات دي مابتبقاش فعالة بنفس الشكل ومش هتحمينا من البكتيريا. لازم تترمي عشان مانستخدمهاش وتسبب لنا تراكم البكتيريا!

7# الصواني المصدية

دايما لازم نفرق بين علامات الحروق وأي بقع في صواني الأكل وبين الصدا. لو الصينية محروقة مفيش مشكلة، لكن مينفعش أبدا نستخدم أي حاجة بدأت تصدي في الأكل.

8# علب الأكل المفتوحة

فترة الصلاحية المكتوبة على الأكل المعلب مقصود بيها صلاحية الاكل وهو لسه مقفول. مجرد ما نفتح الأكل ونستخدمه غالبا بيعيش لمدة أسبوع أو أسبوعين كحد أقصى، أي حاجة بقالها أكتر من كده مفروض تترمي!

9# الزيت القديم

زيت الطبخ من أكتر الحاجات اللي الناس بتخزنها وتنساها! مع إن ده ممكن يسبب إننا نستخدم زيت صلاحيته منتهية أو حتى بايظ وطعمه وريحته متغيرين. لازم نتأكد من صلاحية الزيت قبل ما نستخدمه، ولما يتفتح يتخزن في مكان بعيد عن الحرارة عشان يفضل كويس ويعيش معانا حتى لـ6 شهور.