in

9 تكّات يخلوا البيتزا البيتي زي بتاعة المطاعم!

9 تكّات يخلوا البيتزا البيتي زي بتاعة المطاعم!

دايما البيتزا البيتي مش محبوبة أوي لإنها مابتكونش احترافية ومُغرية زي بتاعة المطاعم. السر في خدع بسيطة جدا، لو عرفناهم هنعمل البيتزا زي المطاعم وأحلى كمان!

1# نظبط العجينة!

لو هنعمل العجينة بنفسنا يبقى لازم نستخدم معايير مظبوطة أو ميزان المطبخ. أو نستخدم العجينة الجاهزة من السوبر ماركت أو فرن الفينو، ميزة عجينة الفينو انها هتكون طازة مش هتحتاج غير إننا نفردها ونحط عليها المكونات على طول!

2# نسيب العجينة ترتاح، ونفردها بالإيد الأول!

سواء عجينة جاهزة أو احنا اللي عاملينها، لازم نسيبها ترتاح وتخمر في حرارة الغرفة، بالشكل ده هتتفرد وتستوي بشكل أحسن وطعمها هيكون مظبوط أكتر.
لازم كمان نمدد العجينة الأول بالإيد قبل ما نفردها، وبعدين نفردها على رخامة مرشوشة بدقيق ونسيبها ترتاح كام دقيقة تاني قبل ما نحط المكونات عليها.


3# نزود القرمشة بدقيق الدرة!

بعد ما نفرد العجينة نقدر ننقلها على صينية واسعة أو قطاعة مفروشة بدقيق الدرة. هيخلينا نقدر نتحكم في العجينة أحسن لما نيجي ندخلها الفرن، والأهم إنه هيخلي البيتزا مقرمشة أكتر لما تستوي.
سر كمان: ممكن نفرش ورقة زبدة كبيرة ونرش عليها رشة دقيق الدرة ونحط العجينة عليها. لإننا مش هنفرد العجينة في صينية الفرن!

4# نخلي الصلصة تقيلة ونتبلها صح!

أحسن صلصة للبيتزا بتتعمل بالطماطم البيوريه، طعمها بيكون أحسن وأقوى من الصلصة الجاهزة. أهم حاجة إننا نسيب الصلصة تغلي كويس وتتبخر عشان تبقى تقيلة. ونتبل الصلصة بالريحان عشان تدينا الطعم الإيطالي المظبوط!

5# نقلل الصلصة عشان الطعم يبان!

نفرد كمية قليلة جدا من الصلصة على العجينة بالتساوي عشان تكون طبقة رقيقة تدي البيتزا طعم مظبوط. لما نعمل الصلصة صح، كمية بسيطة جدا منها هتكون كفاية. الصلصة الكتير بتضيع الطعم الأصلي للبيتزا!



6# نبعد عن الموتزريلا الطازة!

نوع الجبنة الموتزريلا أهم بكتير من كميتها. الجبنة المبشورة أحسن من الموتزريلا الطازة في البيتزا لإن الطازة فيها نسبة لبن أعلى هتخلي البيتزا طرية أكتر من اللازم ومش هتدي نفس الطعم. لو هنستخدم الموتزريلا الفريش يبقى نقطعها شرايح رفيعة جدا ونوزعها على البيتزا.

7# ندهن الأطراف بمسحة زيت زيتون!

الخطوة دي نعملها قبل ما البيتزا تدخل الفرن على طول، مسحة زيت الزيتون الخفيفة هتدي أطراف البيتزا طعم ولون أقوى وتخليها مقرمشة أكتر. ونقدر ندهنها بيه تاني أول ما تخرج من الفرن عشان نخلي الأطراف فيها لمعة جذابة للعين وطعمها أقوى!

8# فرن سخن وصينية سخنة!

قلنا إننا مش هنفرد العجينة في صينية الفرن، لإن لازم صينية الفرن تكون سخنة عشان البيتزا تطلع مقرمشة ومظبوطة! واحنا بنحضر البيتزا يكون الفرن شغال عشان يسخن كويس، وجواه الصينية فاضية عشان تسخن معاه. وبعدين نطلع الصينية وننقل البيتزا بورقة الزبدة اللي فردناها عليها للصينية.
ممكن كمان نقلب الصينية ونحطهم على ضهرها عشان نخرجها بشكل أسهل بعد كده!

9# خلي عينك على البيتزا!

البيتزا مابتحتاجش وقت طويل، عشان كده لازم نركز معاها أول ما الجبنة تبتدي تسيح والعجينة تعلى وتاخد لون دهبي. نحرص كمان على إن البيتزا تكون في نص الفرن، لو حسينا انها مابتستويش بشكل متساوي نفتح الفرن بحركة سريعة ونلفها عشان تاخد كلها نفس السوا وتطلع مظبوطة!
شوفوا كمان 20 حل ذكي هيسهّل حياتك في المطبخ