in

9 أكلات مينفعوش مع مشاكل الهضم!

9 أكلات مينفعوش مع مشاكل الهضم!

كل الناس بتعاني من مشاكل الهضم من وقت للتاني. سواء عسر الهضم أو وجع القولون أو الانتفاخ والإمساك وغيرهم، وعشان نقدر نتخلص من المشاكل دي بسرعة لازم نبعد عن الأكلات اللي ممكن تزودها وتضرنا أكتر في الوقت ده!

1# منتجات الألبان

اللاكتوز اللي في اللبن بيخلي منتجات الألبان من الاكلات اللي بتتهضم بصعوبة ومن المحتمل إن اللاكتوز مايتهضمش كويس ويسبب لنا الانتفاخ والغازات ويخلي الإسهال أسوأ! لو عندنا إسهال أو مشكلة تانية في الهضم لازم نبعد عن اللبن والجبن. لكن الزبادي والرايب  مفيدين لينا، لإن البكتيريا المفيدة اللي فيهم بتحسن عملية الهضم.

2# الحمضيات

الحمضيات مش بس الليمون والبرتقال، الطماطم تعتبر من الحمضيات القوية وبالتالي أي حاجة فيها صلصة أو طماطم مش هتكون مناسبة لو عندنا أي مشكلة في الهضم لإنها ممكن تزودها!


3# الأكل الدسم

الأكل الدسم أو المليان دهون بيسبب انقباضات في الجهاز الهضمي، والانقباضات دي ممكن تسبب الإسهال أو الإمساك حسب حالتها وحسب نوع الدسم أو الدهون اللي أكلناه. لازم نتحنب أي أكل دسم أو دهني طول ما عندنا عسر هضم.

4# الأكل المقلي

زي الأكل الدسم، الأكل المقلي بيسبب انقباضات في المعدة وبيأثر على معدل الهضم، ممكن يسبب الإسهال ووجع المعدة أو ممكن يتسبب في عسر الهضم وتبطيء تفريغ المعدة ويسبب إمساك وألم في القولون!

5# الأكل المُعالج

الأكل المعالج أو المُصنّع فيه أكتر من حاجة ممكن تخلي مشاكل الهضم أسوأ، زي المواد الحافظة والألوان الصناعية وإنه مفيهوش ألياف تخلي الهضم أحسن. بالتالي لو عندنا إمساك أو عسر هضم لازم نبعد عن أي أكل معالج عشان مانخليش المشكلة أسوأ.



6# السكريات أو الأملاح الكتير

لكل واحد منهم تأثيره، لكن في المجمل الاتنين لازم نتجنبهم لو عندنا عسر هضم أو انتفاخ. الأملاح الكتير بتخلي الهضم أصعب وممكن تأثر على سرعة تفريغ المعدة وبالتالي تسبب إمساك. والسكريات الكتير ممكن تسبب اضطرابات الهضم وتزود وجع المعد وتسبب الغثيان!

7# الأكل الحراق

الشطة أو الفلفل بيحفزوا الجهاز الهضمي، لكن التأثير ده مش هيكون كويس لو بنعاني من الإسهال أو القيء ووجع المعدة. لازم نتجنب أي أكل حراق لو عندنا المشاكل دي عشان نقدر نتخلص منها بسرعة بدل ما حالتنا تبقى أسوأ!

8# الأكل المُلوث

سواء أكل بايت في التلاجة ممكن يكون باظ أو أكل مش نضيف من الشارع أو مش مطبوخ كويس، البكتيريا ممكن تسبب لنا مشاكل كتير زي الإسهال ووجع المعدة، وهتخلي أي مشكلة هضم موجودة أسوأ من الأول! شوفوا كمان 9 أسباب يخلوا الأكل يبوظ في التلاجة

9# الكافيين

الكافيين بيحفز الجهاز الهضمي ويزود الانقباضات، يعني ممكن يخلي مشاكل الإسهال والإمساك أسوأ والتخلص منهم أصعب. الكافيين موجود في الشاي والمشروبات الغازية والشوكولاتة مش في القهوة بس، لازم نخلي بالنا من أي حاجة فيها كافيين عشان مانخليش الجهاز الهضمي يرتبك أكتر.