in

9 أفكار عملية توفر وقت تحضير الأكل

بنتلخم دايما في زحمة الأسبوع وتحضير الأكل كل يوم بياخد وقت كتير؟ جبنالكم 9 أفكار تعملوها عشان توفروا أكتر وقت ممكن في المطبخ!

1# نعمل ليست بمشتريات الأسبوع ونشتريها مرة واحدة

بنضيع وقت كتير لما نروح أكتر من مرة ونشتري الحاجة على مراحل، مفروض نعمل ليست بكل اللي هنحتاجه ونشتريه مرة واحدة والأحسن لو يوم في وسط الأسبوع عشان نتجنب الزحمة. حاولوا تخلوا الليست دي على باب التلاجة مثلا عشان تكتبوا كل النواقص أول بأول

2# نقسم الصينية ونسوّي حاجتين في نفس الوقت

نقدر نقسم الصينية بورق الفويل ونسوّي أكتر من حاجة في نفس الوقت، خصوصا لو بنسوّي حاجات مختلفة و لما حاجة فيهم تستوي الأول نشيلها بسهولة ونسيب الباقي يستوي كويس


3# نستخدم المكونات الجاهزة

صحيح المكونات الجاهزة أغلى شوية، لكن هتسعفنا لما ما يكونش عندنا وقت، نقدر نشتري الدريسنج أو البقوليات زي الحمص والفول وغيره جاهزين للاستخدام عشان يوفرولنا وقت ويساعدونا ناكل أكل صحي طول الأسبوع

4# نحضر كميات قليلة من كل حاجة ونكون منهم أكلات مختلفة كل يوم

الصلصة مثلا ممكن نحطها على طبق مكرونة أو نعمل بيها شكشوكة أو حتى نضيفها ف أي طبخة تانية! نحاول ننوع في الأكل عشان ما منزهقش ونجرب كل حاجة بأكتر من طريقة

5# نحضر أكل الأسبوع مرة واحدة

أهم حاجة في تحضير الأكل اننا نوفر وقت، عشان كده المفروض نحضر كل أكل الأسبوع في يوم واحد، السبت مثلا، بحيث اننا ما نقفش في المطبخ كل يوم أكتر من تلت ساعة، لتسخين الأكل أو التسوية النهائية للأكل



6# أو نحضر المكونات الأساسية

لو بنطبخ كل يوم وبنزهق من تسخين الأكل البايت، هنحضر على الأقل المكونات الأساسية اللي بنحتاجها لكل طبخة، مثلاً نقطع البصل ونفرم الثوم ونقطع الخضار وأي مكونات تانية بحيث تبقى جاهزة للطبخ على طول

7# نخزن أي مكونات فضلت معانا في الفريزر للأسبوع الجاي

لو حضرنا خضار أكتر من اللازم مفيش مشكلة، هنشيل الزيادة في الفريزر ونستخدمها في أكل الأسبوع الجاي ونبقى وفرنا وقت زيادة وحافظنا على الأكل

8# نخلي السموزي جهاز للخلاط على طول!

لو بنحب نشرب سموزي كتير، هنقطع الفاكهة أو الخضرة اللي عايزين نعملها ونحط مكونات كل سموزي في كيس في الفريزر، والصبح نفضي الكيس في الخلاط وبقى الفطار جاهز في ثواني

9# نجهز الشوفان للأسبوع مرة واحدة

الشوفان فطار صحي وبيشبع لوقت طويل، لكن ممكن ياخد من وقتنا الصبح عشان يجهز، نجهز كمية كبيرة من وصفة بنحبها لشوفان مطبوخ ونخزنها علشان دايماً نلاقي فطار جاهز كل يوم!