in

8 معلومات هتغير فكرتك عن أكلك!

معظمنا دلوقتي عنده فكرة عن اللحوم إللي فيها مضادات حيوية و الخضار والفاكهة المرشوشين بمبيدات، لكن في أنواع أكل كتير مليانة مفاجئات، حتى الأكل إللي بنعتبره صحي! لو عايزين ناكل أكل مضمون وصحي، في معلومات كتير هتكون مفاجئة بالنسبالنا وممكن تغير إختياراتنا!

1. الفاكهة المجمدة أحيانا بتكون صحية أكتر من الفريش

الدراسات أكدت إن الفاكهة المجمدة فيها نفس الفايدة اللي في الفاكهة الفريش وأحيانا أكتر منها! تجميد الفاكهة بيساعد على الحفاظ على العناصر الغذائية زي فيتامين E والمعادن زي الكالسيوم والحديد وبيخلي الفاكهة متاحة طول السنة

2. الدريسنج الجاهز ممكن يكون فيه مكونات الصن بلوك

ثاني أكسيد التيتانيوم هو المكون الأساسي في الصن بلوك والدهانات وهو المكون المسؤول عن اللون الأبيض. ممكن نلاقي المكون ده موجود في أنواع الدريسنج الجاهزة اللي بنشتريها من السوبر ماركت، لكن نقدر نحمي نفسنا منه بسهولة بإننا نقرا مكونات أي دريسنج هنشتريه والأحسن إاننا نعمل الدريسنج في البيت


3. نظام الأكل الغلط بيضر المخ

في دراسة أسترالية بتقول إن الناس اللي بياكلوا الوجبات السريعة عندهم حُصين (جزء من المخ مهم للذاكرة والتعلّم) أصغر من اللي عند الناس اللي معظم أكلها فريش وصحي. وفي 2017 نشرت مجلة الجمعية الأمريكية للقلب دراسة بتربط بين نظام الأكل والزهايمر، الناس اللي بيشربوا مشروب أو اكتر في اليوم متحلي بسكر صناعي معرضين للخرف أكتر بـ3 مرات من الناس اللي بيشربوا مرة أو أقل في الأسبوع! نعمل ايه؟ نركز على الأكل والشرب المفيد للمخ

4. لبن اللوز مش صحي للدرجة إللي احنا فاكرينها

لبن اللوز الجاهز عبارة عن 4 أو 5 حبات لوز ومياه وفيتامينات وإضافات تخليه شبه اللبن، يعني صناعي جدا. الأحسن اننا ناكل اللوز ونشرب اللبن العادي عشان ناخد أكبر فايدة غذائية بشكل طبيعي من الاتنين

5. الأكل ممكن يبقى أحلى لما يبات

ساعات لما بناكل الأكل تاني يوم بنلاقي طعمه أحلى؟ الموضوع ليه سبب علمي، معهد بحوث تكنولوجيا الأغذية وضّح إن التفاعلات الكيميائية في الأكل ممكن تستمر بعد ما نطبخه ونخزنه، عشان كده ممكن نلاقي الأكل طعمه أحسن بايت (زي البامية مثلاً)



6.الأكل السبايسي ممكن يطول العُمر!

دراسة اتعملت في هارفارد سنة 2015 اثبتت ان الناس اللي بياكلوا أكل سبايسي (حراق) كل يوم كانوا أبعد عن الأخطار الجسدية المُميتة بنسبة 14% من اللي بياكلوا حراق مرة في الأسبوع، ودراسات صينية أكدت النقطة دي وقالت كمان إن المكونات النشطة في الأكل الحراق زي الشطة ممكن تساعد في خفض مستوى الكوليسترول الضار والدهون الثلاثية وتقليل الالتهابات

7.الأناناس ممكن يبوظ حاسة التذوق

بشكل مؤقت لحسن الحظ! التأثير بيدوم ساعات قليلة أو لباقي اليوم بس. كمان في ناس بيحسوا بلسعة لما بياكلوا الأناناس وفي ناس مابيحسوش بيها، السبب في اللسعة دي هو البروميلين، إنزيم بيكسر البروتينات. نقدر نقلل اللسعة دي بإننا نطبخ الأناناس أو نقطعه ونسيبه لتاني يوم قبل ما ناكله، الحرارة والوقت الطويل بيكسروا إنزيم البروميلين اللي بيسبب اللسعة. والأهم نبعد عن قلب الأناناسة لإنه مليان بروميلين!

8. في 460 جالون مياه بيُستهلكوا عشان نعمل برجر واحد!

دراسة أمريكية وضحت إن كل نص كيلو لحمة بيكون نتيجة استهلاك 1,840  جالون مياه! الرقم ده شامل ري الحبوب والعشب اللي البقر بياكله ومياه شرب البقر والمياه اللازمة لعملية إنتاج اللحمة