in

8 استخدامات مهمة لقشر الفاكهة والخضار مايتفوّتوش!

8 استخدامات مهمة لقشر الفاكهة والخضار مايتفوّتوش!

قشور الفاكهة والخضار اللي بنرميها ساعات بيكون فيها فايدة أكبر من الفاكهة والخضار نفسه! جبنالكم استخدامات بسيطة للقشور دي هتخليكوا تستفيدوا منها بأحسن شكل.

1# قشر البصل والتوم بيقلل الحكة والتهابات الجلد!

قشور البصل والتوم ليها خصائص مضادة للفطريات بتخليها فعالة جدا في تخفيف مشاكل الجلد والالتهابات اللي بتسبب الحكة. نغلي القشر في مياه ولما المياه تبرد نحطها على قطنة ونمسح بيها الجلد الملتهب. إلا لو عندنا حساسية من التوم أو البصل طبعا!

2# قشر التفاح بيحمي من التجاعيد المبكرة!

قشور التفاح فيها فيتامينات A و C و E والتلاتة مهمين جدا للبشرة وتجديد الخلايا. لو ما بنحبش ناكل التفاح بقشره يبقى نستغل القشر صح! نسيب قشر التفاح على البشرة لمدة 5 أو 10 دقايق عشان البشرة تمتص الفيتامينات اللي فيه وبعدين نشيله ونغسل وشنا. 


3# قشر الفواكه بيتعمل شاي نكهات!

ممكن نغلي قشر التفاح والليمون والبرتقال وهو لسه فريش ونشرب الشاي بتاعه، هيكون مفيد جدا وطعمه مميز. وممكن نجفف القشر ونضيفه بعدين للشاي العادي عشان يديله نكهة جديدة!

4# قشر البطاطس  بيتخلص من انتفاخات العين بسرعة!

صحيح ممكن نتخلص من الانتفاخات حوالين العين بأكتر من طريقة، لكن قشر البطاطس يعتبر من أسرعهم وأحسنهم لإنه مش بس بيتخلص من الانتفاخات، لكن كمان بيرطب الجلد حوالين العين ويغذيه. خصوصا  لو القشر ساقع في التلاجة هيدينا نتيجة أحسن بكتير.

5# قشر البطيخ ممكن يتاكل!

عارفين إنه ناشف ومش مسكر، لكن قشر البطيخ فيه فيتامينات A و C و B6 بتركيزات عالية ودي فايدة مش مفروض نرميها! قشر البطيخ ممكن يتخلل أو يتغلي ويتكرمل أو يتسلق ويتحط في الشوربة! فكرة غريبة لكن فايدتها تستاهل أكيد، ونقدر نشيل القشرة الخارجية الخضرا لو حابين.



6# قشر الليمون بينضف البراد!

الرواسب اللي بتبقى في البراد أو الحلل أحيانا بسبب غلي المياه مضرة ومينفعش نسيبها تتراكم. أحسن حل ليها هو غلي قشر ليمون فيها عشان يتخلص من كل الرواسب دي. الجميل إن قشر الليمون هينضف الحاجة من غير ما يسيب فيها طعم قوي زي الخل!

7# قشر الخيار الطازة بيبعد النمل!

صحيح إن الأكل المكشوف بيجيب النمل، لكن قشر الخيار بيعكس المعادلة دي. قشر الخيار فيه مركبات مضادة للفطريات، عشان كده ريحة قشر الخيار بتطرد النمل وتخليه بعيد. لكن لازم يكون القشر طازة لإنه لما يقدم وريحته تروح مش هيكون له تأثير!

8# قشر الموز بيطري اللحوم!

لو بنعمل صدور فراخ في الفرن أو ستيك لحمة وعايزينها تفضل طرية وماتنشفش، أحسن حل إننا نلفها بقشرة موز! هتحافظ على عصارة اللحوم وتخليها طرية ومستوية كويس، ومش هتأثر على الطعم. شوفوا كمان 6 استخدامات مفيدة لقشر الموز ما تخطرش على بالك!