in

8 استخدامات مفيدة للزبدة هتحل لك المشاكل دي!

كلنا بنجيب الزبدة للطبخ بس ومانعرفش انها ممكن تكون حل سحري لمشاكل كتير بتقابلنا كل يوم مالهاش علاقة بالطبخ!

1# منع تعفن الجبنة

الجبن الصلبة زي الشيدر والرومي وغيرهم، أطرافها بتنشف في التلاجة وممكن تبتدي تعفن. نقدر نمنع المشكلتين دول بإننا ندهن الجبنة بالزبدة بعد ما نقطع منها كل مرة خصوصا عند الأطراف، وبعدين نغلفها ونحطها في التلاجة

2# تقطيع الأكل بسلالسة

قبل ما نقطع أي أكل طري وبيلزق ندهن السكينة أو مقص المطبخ بالزبدة، هتعمل عازل يخلي الأكل ما يلزقش في السكينة ويضايقنا


3# منع فوران المياه

عشان نمنع أي حاجة بتغلي إنها تفور على البوتجاز زي مياه المكرونة مثلا ممكن نضيف لها نص معلقة كبيرة زبدة أو ندهن حرف الحلة بالزبدة وهتمنع فوران المياه برة الحلة مهما غليت

4# بتسهل بلع أقراص الدوا

لو بنواجه صعوبة في بلع حبوب الدوا، خصوصا الاقراص الكبيرة، ممكن ندهنها بالزبدة قبل ما ناخدها وهتساعدنا نبلعها بسهولة من غير ما نحس انها واقفة في زورنا

5# تصليح صوت مفصلات الباب

لو الباب بيعمل صوت (بيزيّق) ومعندناش الزيت المخصص للمفصلات، نقدر ندهنها بالزبدة، هتخلي حركتها أنعم وتحل مشكلة الصوت بسهولة



6# بتطلع اللبان من الشعر

اللبان اللي بيلزق في الشعر مشكلة كبيرة، لكن معلقة زبدة صغيرة هتحلها فوراً! ندهن اللبانة والشعر حواليها بالزبدة وبعدين نسحب اللبانة من الشعر بكل سهولة

7# وعلاج للشعر الجاف

الشعر الجاف والمقصف الباهت ممكن نعالجه بماسك زبدة! هندهن الشعر بالزبدة ونغطيه نص ساعة وبعدين نغسله بالشامبو كالمعتاد وهنلاقي الشعر طري وبيلمع

8# خلع الخواتم الضيقة

احيانا بنلبس الخاتم بسهولة بس ما نعرفش نقلعه سواء عشان الخاتم ضيق في أو صوابعنا ورمت لأي سبب، في كل الحالات نقدر ندهن الخاتم كويس بالزبدة وبعدين نسحبه وهيتزحلق في صوابعنا ويخرج بسهولة