in

8 أكلات تنفع على البحر، و 5 مينفعوش خالص!

8 أكلات تنفع على البحر، و5 مينفعوش خالص!

أكتر حاجة محتاجينها واحنا رايحين البحر إن أكلنا يكون خفيف واحنا شايلينه وخفيف لما ناكله، عشان كده عمالناكم ليست بالأكل المناسب على البحر والأكل اللي مفروض نبعد عنه.

1# ينفع ناخد بيض مسلوق

ممكن يكون اختيار غريب لكن البيض المسلوق ليه مميزات مهمة جدا على البحر، أولها انه خفيف ومابياخدش مساحة، وسهل نغسله لو جه عليه رمل أو مياه مالحة، وفي نفس الوقت فيه جرعة بروتين وقيمة غذائية كبيرة تدينا طاقة وتنشط جسمنا خصوصا لو هننزل المياه.

2# ماينفعش ناخد محشي

باقولك عايز صباع محشي! لكن للأسف المحشي تقيل جدا وهضمه بياخد مجهود، وممكن يعمل لنا انتفاخ وغازات ودي آخر حاجة عايزينها في المياه!


3# ينفع ناخد سلطة مكرونة

أكلة سهلة وخفيفة وبتتهضم بسرعة، اختيار هايل عشان ناكل ونشبع من غير ما نتعب خصوصا لو هننزل المياه. الجميل إنها بتكون لذيذة جدا وهي باردة .. شوفوا وصفة سلطة المكرونة بالرانش من هنا.

4# ماينفعش ناخد مكرونة بشاميل!

المكرونة البشاميل دسمة جدا، صوص البشاميل واللحمة والزيت بيخلوها مش أكلة مناسبة للبحر، هتسخّن الجسم وتحسسنا بخمول وهنتعب لو اتحركنا كتير بعد ما ناكلها.

5# ينفع ناخد سلطات بالحبوب الكاملة

أي سلطة فيها خليط من الخضار والحبوب الكاملة من أول التبولة للسلطات الغربية، كلها ممتازة على البحر. وجبة متكاملة وخفيفة على المعدة وسهل ناخدها معانا في أي علبة مقفولة .. شوفوا وصفة سهلة للتبولة اللبناني من هنا.



6# ينفع ناخد كباب

ومش لازم يكون لحمة! نقدر نحط شرايح الفاكهة أو أي أكل في اسياخ الكباب، هيبقى سهل نشيلها وسهل ناكلها على البحر حتى لو إيدينا فيها رمل لإننا هنمسك السيخ مش الأكل نفسه!

7# ماينفعش ناخد شاي وقهوة

عارفين إن صعب اليوم يعدي من غير شاي وقهوة، لكن الكافيين اللي فيهم بيطرد المياه من الجسم وبيخليه يفقد ترطيبه، ولو حاولنا نعوض ده بشرب مياه كتير، هنتعب من كتر دخول الحمام!

8# لكن ينفع ناخد سموزي

مفيش أحسن من عصير الفاكهة المتلج ينقذنا من حر الشمس وينعش الجسم على البحر، ناخد  ترمس سموزي مع ترمس المياه عشان نرطب جسمنا ونغذيه.

9# ماينفعش ناخد مشروبات غازية

السكريات الصناعية في المشروبات الغازية مضرة جدا بالجسم وبتسبب خمول للعضلات وممكن مع الحركة والنشاط على البحر تسبب لنا تعب، غير إنها بتضر البشرة وتخليها تشيخ بسرعة!

10# ينفع ناخد زبادي

أسهل أكلة ممكن ناخدها معانا، مش محتاجة تحضير ولا مجهود في النقل، والأهم إننا ممكن نعتمد عليه كوجبة كاملة لإن قيمته الغذائية كبيرة جدا! الزبادي خفيف ومنعش وبيحسن الهضم، عشان نعرف نستمتع بوقتنا على البحر من غير حموضة وإحساس بالتقل.
ولو الزبادي سادة نقدر نستخدمه على بشرتنا كمان عشان يخفف من أي حروق شمس ممكن نتعرضلها في المصيف. شوفوا كمان 7 أكلات تساعدك في علاج حروق الشمس

11# ماينفعش ناخد سندوتشات طرية (فول، مربى، بابا غنوج وغيره)

الأكل السايل زي الفول والمربى والجبنة بطماطم وغيرهم مش اختيار مناسب أبداً للبحر خصوصا في سندوتشات. العيش هيبوش والتعامل مع السندوتش هيبقى صعب ويعرضنا للتلزيق والبهدلة!

12# ينفع ناخد سندوتشات ملفوفة (سوري)

ميزة السندوتشات اللي بالعيش الصاج او عيش التورتيلا الملفوفة زي الشاورما إنها أسهل في الأكل من سندوتشات العيش البلدي والفينو لإنها متماسكة أكتر، وصعب يدخلها رملة وتتبهدل. كمان تغليفها سهل جدا وما بتاخدش مساحة كبيرة.

13# ينفع ناخد عنب

فاكهة الصيف كلها مرطبة ومليانة فيتامينات مفيدة، لكن ميزة العنب إن نسبة المياه فيه كبيرة جدا، يعني نقدر نجمده في وقت قصير وناخده معانا متلج، هيبقى حلو جدا سواء كلناه مباشرة أو حطيناه في المياه يسقعها ويديها طعم منعش! نفس الكلام ينطبق على البطيخ…