in

7 أكلات تهدّي الأعصاب وتقلل التوتر!

7 أكلات تهدّي الأعصاب وتقلل التوتر!

التوتر غلط على صحتنا وبيسبب مشاكل كتير وكلنا عارفين ده، لكن صعب جدا نحافظ على هدوء أعصابنا طول الوقت! اللي نقدر نعمله إننا نعتمد على الحاجات اللي بتهدّي الأعصاب بسرعة وتخفف التوتر والقلق. الأكل ده من أهمهم وأكترهم فاعلية!

1# الرومي

الديك الرومي من أكتر الأكلات الغنية بالتريبتوفان اللي بيحفز إفراز السيرتونين في الدماغ. أكل قطعة رومي بيساعد في تهدية الأعصاب وتخفيف الشعور بالقلق والتوتر، لكن نخلي بالنا لإن وجبة رومي تقيلة ممكن تهدي أعصابنا لدرجة النوم!

2# اللوز

اللوز غني بالزنك اللي معروف إنه من المواد اللي بتعدّل الحالة المزاجية، ومعاه الحديد اللي بيخفف القلق الناتج عن الإرهاق الزايد.


3# السلمون

السلمون غني بالأوميجا 3 اللي بتدعم وبتحسن صحة الدماغ والحالة المزاجية وبالتالي بيقلل التوتر واضطرابات القلق. وبيقلل التقلبات المزاجية المصاحبة للدورة الشهرية كمان!

4# الشوكولاتة الدارك

الكاكاو من محفزات إفراز السيرتونين في الدماغ وده بيقلل القلق وبيحسس بالهدوء والسعادة. كمان الشوكولاتة الدارك غنية بمضادات الأكسدة اللي بتخفف الضغط العصبي والتوتر.

5# البابونج

البابونج أو الكاموميل من أكتر الحاجات اللي بتقلل التوتر لإنه مسكن للجهاز العصبي وفيه مضادات للالتهابات ومضادات أكسدة بتقلل الشعور بالقلق.



6# التوت

التوت غني جدا بفيتامين C اللي بيساعد بشكل كبير في تخفيف القلق والتغلب على أعراض التوتر والضغط العصبي وبيساعد في تحسين المزاج.

7# اللبن الدافي

ناس كتير بتشرب لبن دافي بالليل عشان يساعدهم على النوم أو بيدوه للأطفال عشان يناموا أسرع. السر إن اللبن بيساعد في تقليل ضغط الدم العالي بسبب طبيعة البروتين اللي فيه وبيهدي الأعصاب ويساعد على ارتخائها وبالتالي تخفيف أي ضغط عصبي أو توتر موجود.
شوفوا كمان 5 حاجات بناكلها ممكن تزود الاكتئاب والقلق!