in

6 حاجات بنعملهم مع اللحمة لازم نبطلهم!

6 حاجات بنعملهم مع اللحمة لازم نبطلهم!

معظمنا عارف ازاي بيتعامل مع اللحوم ويطبخها، لكن الحقيقة إن في حاجات كتير من اللي بنعملها غلط جدا! منها اللي بيأثر على الطعم أو سوى اللحمة، ومنها اللي بيأثر على صحتنا بشكل مباشر! 

1# بنغسل اللحمة!

غسل اللحوم من أكبر الغلطات اللي كلنا بنعملها وفاكرين إنها حاجة صحية! اللحوم النية كلها بكتيريا بتسبب أمراض كتير، غسل اللحمة بيخلي البكتيريا دي تتنقل لكل حاجة في المطبخ تقريبا، إيدينا والحوض وأي أدوات قريبة منها.

2# بنقطع اللحمة غلط!

مهم جدا نعرف التكنيك الصح لتقطيع اللحمة لإنه هيفرق كتير في النتيجة.  المفروض نقطع اللحمة بشكل عمودي على الألياف اللي فيها (زي الصورة) عشان تستوي أحسن ونقدر نقطعها بعد كده وناكلها بسهولة أكتر.


3# بنطبخ اللحمة من غير توابل!

المفروض إن اللحمة يترش عليها ملح قبل ما تتحط على النار مش بعد ما تستوي، ويفضل نسيبها 40 دقيقة ترتاح بعد ما نرش الملح عليها. الفترة دي مهمة عشان عصارة اللحمة تتوزع كويس، ده هيخليها تستوي بشكل أحسن وطعمها أقوى بكتير!

4# بنطبخ اللحمة وهي لسه ساقعة!

فترة الـ 40 دقيقة اللي لازم نسيب اللحمة ترتاح فيهم مهمة كمان عشان لو اللحمة كانت في التلاجة. لو كانت في الفريزر المفروض ننزلها تفك في التلاجة من اليوم اللي قبله، وبعد كده نطلعها ونسيبها ترتاح قبل الطبخ. لا نفكها من التجميد بسرعة ولا نخرجها من التلاجة على الحلة على طول!

5# بنحط اللحمة في حلة باردة!

لازم الحلة أو الطاسة اللي هنعمل فيها اللحمة تكون سخنة وعلى النار قبل ما نحط اللحمة فيها. الحلة السخنة بتخلي اللحمة تستوي بشكل متساوي وما تلزقش. حتى لو هنستخدم زيت، مفروض الحلة تكون سخنة قبل حتى ما نحط الزيت فيها!



6# تتبيلة اللحمة مش مظبوطة!

لو بنتبل اللحمة للشوي أو لأي وصفة محتاجة توابل معينة، لازم نخلي بالنا إن التبيلة ليها شروط كتير:

  • لازم كمية مكونات التتبيلة كلها تكون مناسبة لكمية اللحمة اللي هنتبلها، عشان ما يكونش طعم مكون واحد أقوى من غيره.
  • لازم تتبيلة كل وصفة تكون كاملة لإن كل مكون بيخلي طعم اللحمة متوازن، مينفعش نشيل أي مكون من الوصفة وإلا مش هنلاقي الطعم اللي عايزينه.
  • لازم ندي اللحمة الوقت الكفاية للتتبيلة حسب الوصفة، الاستعجال هيخلي اللحمة ماتشربش الطعم وهيأثر كمان على سوى اللحمة!