in

6 أكلات يقللوا ريحة العرق، و7 نبعد عنهم في الصيف!

6 أكلات يقللوا ريحة العرق، و7 نبعد عنهم في الصيف!

العرق حاجة طبيعية وصحية جدا خصوصا في الحر ده، لكن أكيد الريحة الوحشة مش صحية ولا محبوبة. في أكلات ممكن تقلل الريحة دي وأكلات ممكن تخليها أسوأ! لازم نعرف الأول الأكلات اللي ممكن تساعدنا نتجنب ريحة العرق المزعجة!

1# الحمضيات

الليمون والبرتقال والجريب فروت فيهم نسبة كبيرة من مضادات الأكسدة وبيساعدوا في تنضيف الجسم من السموم وده بيقلل احتمالية الريحة الوحشة للعرق.

2# الزبادي

البكتيريا النشطة في الزبادي بتقلل مركبات الكبريتيت اللي بتسبب ريحة وحشة للجسم. زائد إن الزبادي فيه فيتامين د اللي بيساعد في محاربة البكتيريا اللي بتسبب روايح كريهة سواء في الجسم أو في البُق.


3# القرفة

من المعروف إن القرفة بتساعد في تحسين ريحة البُق، كمان تقدر تساعدنا في التخلص من الريحة الوحشة للعرق. القرفة ليها ريحة مميزة ومفيهاش أي مواد كبريتية زائد إنها مضادة للأكسدة وبتخلي ريحة الجسم كويسة لفترة طويلة.

4# الكرفس

الكرفس ديتوكس ممتاز بيخلص الجسم من الفضلات والسموم اللي بتخلي مسام الجسم ريحتها وحشة. كمان الكرفس بيحفز إطلاق الفيرمونات في الجسم واللي بتخلي ريحة الجسم كويسة حتى مع العرق.

5# الشاي الأخضر

الشاي الأخضر غني بمضادات الأكسدة وبيساعد في تنقية الجسم من الفضلات وبيحسن عملية الهضم. ده بيأثر بشكل واضح على ريحة الجسم كله من أول ريحة العرق وريحة الرجلين لحد ريحة النفس! 



6# الحبهان

 الحبهان بيتخلص من الروائح الكريهة اللي بتسببها المواد الكبريتية والفضلات والسموم في الجسم وبيخلي العرق بدون ريحة. مفعول الحبهان سريع جدا لإن الجسم بيمتصه بسرعة، يعتبر مفيد جدا مع أو بعد أي أكلة فيها حاجات بتسبب  ريحة وحشة.

نبعد عن الأكلات اللي بتزود ريحة العرق أو بتخليها أسوأ:

1# الكرنب والبروكلي والقرنبيط

الخضروات دي فيها نسبة كبيرة جدا من الكبريت اللي بيصدر عنه روايح كريهة سواء على شكل غازات في البطن أو ريحة في العرق. رغم إن كل خضرة منهم ليها فايدتها، لازم نبقى عارفين إنهم ممكن يسببوا ريحة وحشة للجسم كله!

2# الحلبة

رغم إن الحلبة مدرة للبول وبتنضف الجسم من السموم، لكن ريحتها القوية بتخليها تأثر على ريحة العرق وبتخليها أقوى

3# التوم

ريحة التوم القوية ما بتبقاش وهو بيتقطع بس، لما بناكله، الكبريت والمواد اللي بتسبب الريحة دي بتتحلل في الجسم وبتختلط مع العرق وبتخلي ريحة الجسم وحشة وقوية. لازم لما ناكل التوم نعمل حساب المشكلة دي ونحاول ناكل حاجة تتغلب على الريحة دي.
شوفوا كمان الفوايد المدهشة للتوم و10 توابل وأعشاب للأكل وتأثيرها على صحتنا!

4# البصل

زي ما بيبان جدا في ريحة البُق والنفس، البصل كمان بيأثر على ريحة الجسم بشكل عام. الغازات اللي في البصل بتفضل ممزوجة مع ريحة العرق ومع النفس لمدة طويلة إلا لو أكلنا حاجة تكسر ريحتها وتتخلص منها.

5# اللحوم الحمرا

دراسات كتير أثبتت إن اللي بياكلوا لحوم كتير بتكون ريحة عرقهم وفضلات جسمهم أسوأ وأوضح بكتير من اللي بيقللوا أكل اللحوم. السر في الأحماض الدهنية اللي بتمتزج مع فضلات الجسم وتعمل ريحة وحشة في العرق.

6# البسطرمة

بما إنها عبارة عن لحمة حمرا متغرقة توابل وتوم، البسطرمة من أكتر الأكلات اللي بتظهر في ريحة العرق وتخليها قوية ووحشة.

7# الشاي والقهوة

الكافيين بيسبب الجفاف وبينشط الجهاز العصبي المركزي وبيحفز الغدد العرقية. وفي نفس الوقت، نقص الترطيب اللي الكافيين بيسببه بيخلي البكتيريا تتغذى وتسبب ريحة وحشة للعرق وللنفس كمان! 
لازم نحرص على شرب كميات كبيرة من المياه وأكل حاجات تقاوم البكتيريا عشان نقلل الروايح الكريهة على قد ما نقدر. كل ده مع النضافة الشخصية عشان العرق ما يتراكمش في مسام الجسم ويسبب لنا ريحة مزعجة ومشاكل صحية تانية!