in

5 حيل عشان ماترميش الأكل تاني

كل واحد مننا بيرمي حوالي ربع كيلو أكل يوميا من غير ما ينتبه، عشان كده هنقولكم 5 أفكار عشان تستفيدوا بكل لقمة من غير ما حاجة تبوظ أو تترمي

1# اشتري بالعقل

قبل ما ننزل نشتري حاجة الأسبوع، لازم نعمل ليست باللي هنحتاجه بالظبط عشان مانشتريش زيادة، ونسيب يومين للأكل البايت أو أي خروجة أو تغيير مفاجئ ومانشتريش أي حاجة ممكن ما ناكلهاش

2# خلي الأكل قدامك

لازم نتجنب زحمة التلاجة أو دولاب المطبخ اللي بتخلينا مش شايفين الأكل وبالتالي بيتنسي ويبوظ، اعملوا زي المحلات، خلوا الأكل الجديد ورا والقديم قدام عينيكم عشان تستخدموه أول بأول


3# ماتغرفوش كتير

ممكن لو خلصنا الطبق نزود شوية، لكن غالبا الأكل اللي بيفضل في الاطباق بيترمي، خصوصا ان الأطباق الكبيرة بتبّين ان الأكل قليل حتى لو هو كفاية

4# إعملوا حساب الأكل البايت

حلو اننا مانرميش الأكل الباقي، بس المفروض بعد ما نحتفظ بيه ناكله مش نسيبه لحد ما يترمي في الآخر! الأكل البايت ممكن يبقى وجبة جاهزة لتاني يوم ويوفرلنا وقت وفلوس أكل جديد

5# اختبروا الصلاحية

تواريخ الصلاحية اللي على المنتجات بتبقى لصلاحية وجودها في المحلات،والمنتجات بتكون صالحة للاستخدام حوالي أسبوع بعدها، اعتمدوا على حدسكم واختبروا الحاجة بدل ما ترموها على طول