in

5 حاجات جرب تعملهم العيد ده

5 حاجات جرب تعملهم العيد ده

بما إننا بنستنى العيد الصغير من السنة للسنة لازم نستغله صح، خصوصا أول يوم عشان نحس ببهجة العيد وما نضيعوش في النوم زي كل سنة!

1# صلاة العيد في مكان مختلف

نحاول دايما ما نفوتش إحساس صلاة العيد، واللي هيخلي صلاة العيد أحلى هي المساحات المفتوحة! بدل ما نصلي في أي جامع قريب، نشوف الجوامع الكبيرة والمساحات والميادين المكشوفة اللي بيبقى فيها تجمعات للصلاة، هتحسوا بروح العيد بشكل أكبر بكتير!

2# الخروج الصبح

محدش بيخرج أول يوم العيد، الدنيا زحمة أوي؟ الحقيقة إن محدش بيخرج فعلا أول يوم الصبح، عشان كده الشوارع بتكون رايقة من الفترة بعد الصلاة ولحد العصر، جربوا تفطروا اليوم ده بره وتقضوا النهار في مكان حلو


3# نجرب حلويات العيد الجديدة

كلنا متعودين على الكحك والبيتي فور والبسكويت والغريبة، حلويات العيد التقليدية، لكن جربتوا الاختراعات الجديدة من الحلويات دي؟ زي الكحك بالريد فيلفت أو أشكال البيتي فور الجديدة؟ التجديد في الحلويات بيحسسنا بالعيد بشكل مختلف عن كل سنة!

4# خلي العيد ينور البيت

زي ما قلنا ان أول يوم العيد الصبح بيبقى رايق وهادي، لازم نفتكر إن بالليل هنلاقي أغلب أماكن الخروج زحمة وخصوصا قرب السينمات والمطاعم، فممكن نختم اليوم بلمة العيلة ونزين البيت عشان أجواءه تحسسنا بفرحة العيد أكتر وأكتر!

5# السفر

الخطوة دي ممكن ناخدها قبل العيد بحيث نقضي أول يوم العيد في المصيف أو المكان اللي عايزين نروحه، أو نقضي أول يوم وسط حبايبنا وبعدين نسافر، خصوصا إن الزحمة هتكون أقل من أول يوم! السفر استغلال جميل لإجازة العيد وفرصة حلوة لتغيير الجو قبل الرجوع لمشاغل الحياة
وكل عيد وانتو طيبين!