in

23 أكلة بنخزنهم، اعرفوا صلاحيتهم في التلاجة والفريزر قد ايه!

صحيح إن التلاجة والفريزر بيحافظوا على الأكل لمدة أطول، لكن لازم نعرف إن لكل حاجة عمر محدد سواء في التلاجة أو الفريزر عشان ما تبوظش أو تبقى مضرة بصحتنا!

1# اللحوم النية

اللحوم النية ممكن تفضل في التلاجة يومين بالكتير، وفي الفريزر لحد 6 شهور. مع مراعاة انها تكون متغلفة كويس في الحالتين عشان البكتيريا.

2# اللحمة المفرومة

أقصى مدة ليها 3 ايام في التلاجة، ومن شهرين لـ 3 شهور في الفريزر.


3# اللحوم المطبوخة

ممكن نحتفظ بيها من يومين لـ3 أيام في التلاجة، ومن شهرين لـ3 شهور في الفريزر.

4# السجق

مش المفروض نخزن السجق فترة طويلة قبل ما نطبخه عشان البكتيريا. يوم أو يومين في التلاجة، شهر أو شهرين في الفريزر.

5# اللانشون

صلاحية اللانشون مش طويلة أوي زي ما احنا فاكرين. أسبوع أو اسبوعين قبل ما يتفتح في التلاجة، و4 ايام لو اتفتح، وشهرين بالكتير في الفريزر. وزيه السوسيس والسلامي…



6# الدواجن النية

الدواجن النية ماتقعدش في التلاجة أكتر من يومين، أما في الفريزر ممكن تقعد سنة لو كاملة، و9 شهور لو متقطعة.

7# الدواجن المطبوخة

الدواجن المطبوخة ممكن تقعد لحد 3 أيام في التلاجة، لكن في الفريرز بتختلف مدتهم شوية. الفراخ المحمرة والمسلوقة والمعمولة في طبيخ ممكن تقعد 6 شهور، لكن الناجتس والبانيه آخرهم 3 شهور.

8# السمك الني

السمك الني يعيش في التلاجة كويس يوم أو يومين بالكتير، أما في الفريزر ممكن يعيش 3 شهور لو سمك رفيع، و6 شهور لو سمك دهنه كتير.

9# التونة والسمك المعلب

السمك المعلب ممكن يعيش أكتر من سنة بره التلاجة، حسب الصلاحية المكتوبة عليه. مجرد ما يتفتح ممكن يقعد في التلاجة 3 أيام أو 4 كحد أقصى، وممكن نطلعه من علبته ونخزنه في الفريزر لمدة شهرين.

10# الكابوريا وأم الخلول

الكابوريا وأم الخلول ومعظم فواكه البحر ما تقعدش في التلاجة أكتر من يومين، في الفريزر ممكن نخزنهم من 3 لـ6 شهور.

11# السمك المطبوخ والمدخن

السمك المطبوخ والمدخن بيعيش من أسبوع لأسبوعين في التلاجة، وشهرين في الفريزر.

12# اللبن

اللبن بعد ما يتفتح ممكن يقعد من أسبوع لـ10 أيام في التلاجة، , ومن 3 لـ6 شهور في الفريزر. لكن يستحسن ما نجمدش اللبن في الفريزر لإنه بيتمدد وممكن يقطع لو ما اتغلاش أول ما يخرج.

13# الزبادي

صلاحية الزبادي في التلاجة أسبوع لو اتفتح، لكن لو ما اتفتحش ممكن يعيش مدة الصلاحية المكتوبة على العلبة.

14# الجبنة

علب الجبنة المقفولة هتعيش حسب الصلاحية المكتوبة على علبتها، أما لو اتفتحت تقعد في التلاجة من أسبوع لأسبوعين. ما بنخزنش الجبنة في الفريزر لإنها بتقطع.

15# العيش

العيش بيعيش حوالي 3 شهور في الفريزر، ومن أسبوع لأسبوعين في التلاجة. لكن يستحسن ما نخزنوش في التلاجة عشان ما يرطّبش.

16# الطبيخ

ممكن نسيب الطبيخ في التلاجة أسبوع، أو نخزنه في كيس فريزر أو علبة بتتقفل كويس ونسيبه في الفريزر 3 شهور.

17# الخضار المجمد

الخضار المجمد ممكن يفضل في الفريزر 12 شهر مادام ما اتفتحش ولا فك من التجميد، ويفضل في التلاجة يوم واحد عشان يفك.

18# عصير الفواكه

العصير الجاهز ممكن يقعد لحد أسبوعين في التلاجة، أما العصير الفريش 6 ايام. وممكن نجمد الفريش، أما العصاير الجاهزة ما تتخزنش في الفريزر، وفي العموم يستحسن ما نجمدش عصير الفاكهة عشان طعمه ما يتغيرش.

19# الفاكهة

الفاكهة ما بتتخزنش في الفريزر لإنها هتبوش وهترّطب وغالبا مش هنعرف ناكلها بعدين، ما بتتخزنش في الفريزر إلا لو هنعملها سموزي. وكل فاكهة بتتشال في التلاجة لفترات قليلة حسب نوع الفاكهة:
التفاح ممكن يقعد شهر في التلاجة  ودي تعتبر أكتر فاكهة عمرها طويل في التلاجة.
الكانتلوب بيقعد في التلاجة أسبوع والبطيخ والعنب 6 ايام.
الحمضيات زي البرتقال والليمون ممكن نخزنهم في التلاجة لمدة أسبوعين.
الفراولة والتوت والخوخ بيعيشوا 3 ايام في التلاجة.
الكمترى تقعد أسبوعين في التلاجة.

20# الخضار المعلب

الخضار المعلب مدة صلاحيته في التلاجة 3 ايام من أول ما يتفتح، أما لو مقفول فمدة صلاحيته حسب المكتوب على العلبة. مابنخزنش الخضار المعلب في الفريزر.

21# الرز والمكرونة

الرز والمكرونة المطبوخين ما بيتخزنوش في الفريزر عشان ما يعجّنوش. الرز ممكن يقعد في التلاجة من 5 لـ 7 أيام بالكتير، والمكرونة من 3 لـ 5 أيام مع الحرص على إنها تكون في حلة أو علبة مقفولة كويس.

22# البيض

البيض الني ممكن يفضل 6 أسابيع في التلاجة، والبيض المسلوق أسبوع واحد بس. وما يتخزنش في الفريزر في الحالتين.

23# الكريمة

الكريمة بتعيش في التلاجة من 5 ايام لأسبوع، لكن لازم تتشال بعد الاستخدام مباشرة وتكون على رف التلاجة مش في الباب لإنها محتاجة برودة عالية. مابتتخزنش في الفريزر عشان ما تبوظش. شوفوا كمان 11 أكلة مينفعش يتشالوا في الفريزر