in

15 أكلة ماينفعوش مع البرد

البرد لوحده رخم بما فيه الكفاية، لو عايزين نخف منه بسرعة لازم نعرف الأكل اللي مينفعش ناكله مع البرد، حتى لو أكل صحي في العادي لكن مش هيكون مناسب لما يكون البرد والكحة مسيطرين علينا

1# الفراولة

صحيح الفراولة من أكتر الفواكه الصحية لكنها بتزود إفراز الهيستامين في الجسم ودة هيزودلنا الإحتقان لو عندنا برد!

2# الحلويات

مفروض نقلل أي حاجة مليانة سكر بشكل عام لإن كتره غلط على صحتنا، خصوصا لما نبقى عيانين، السكر بيزود الإلتهاب وبيضعف المناعة لإنه بيضعف خلايا الدم المسؤولة عن مواجهة المرض


3# اللبن

اللبن بيزود إفراز المخاط وبيخليه أتقل، وبالذات لما يكون كامل الدسم. ده بيخلي الحساسية والبرديفضلوا معانا مدة أطول.

4# الجبنة والآيس كريم

منتجات الالبان كاملة الدسم بتزود الالتهابات، لازم نتجنبها طول ما عندنا برد

5# القهوة

القهوة بتزود الجفاف في الجسم وممكن تخلي عضلات جسمنا توجعنا أكتر مع البرد



6# الفلفل الحار (الحراق)

حرارة الفلفل الحامي بتعمل ازعاج للجيوب الأنفية وده بيزود إفراز المخاط، الأحسن نبعد عن الشطة والفلفل الحامي لحد ما نخف

7# الكالاماري

الكالاماري من أكتر الأكلات اللي بتزود إفراز الهستامين في الجسم وده مش كويس للجيوب والممرات الأنفية، غير إنه لو مقلي الزيت اللي فيه هيزود الالتهابات أكتر

8# الموز

الموز فاكهة كلها فوايد، لكن بلاش ناكلها واحنا عيانين. الموز بيحفز إفراز الهستامين في الجسم زائد إنه مليان سكر وده هيزود الالتهابات ويقلل قوة الجهاز المناعي في مواجهة المرض

9# التونة

التونة زي الكلاماري من أكتر الأكلات الغنية بالهستامين اللي بيزود الالتهابات وممكن تسبب لنا احتقان في الجيوب الأنفية

10# الفول السوداني

الفول السوداني من أكتر الأكلات اللي بتسبب حساسية وكمان ممكن تسبب زيادة إفراز الهستامين بصورة كبيرة

11# المكرونة

زي السكر، الكربوهيدرات البسيطة ممكن تزود الالتهابات وتخلي الجهاز المناعي ضعيف في مواجهة المرض

12# البرتقال

كلنا بناكل برتقال لو عندنا برد عشان فيتامين سي يزود المناعة، لكن لو عندنا احتقان في الزور أو صعوبة في البلع فالبرتقال هيحرق زورنا أكتر، الأحسن اننا نشرب مياه كتير وعصاير خفيفة عشان زورنا

13# الجبنة الريكفورد

يستحسن نبعد عن الجبنة الريكفورد طول ما عندنا برد وخصوصا لو عندنا مشاكل في الجيوب الأنفية وصداع، الريكفورد مليانة ثيامين اللي بيزود الصداع

14# اللانشون

اللحوم المصنعة زي اللانشون والسوسيس مش أكل صحي في الأصل وممكن واحنا عيانين يسببولنا حُمّى، كمان فيهم مادة النيتريت اللي بتسبب الصداع، مينفعوش مع البرد أبداً

15# الخل

الحاجات المتخمرة زي الخل فيها نسبة هستامين عالية، هيزود الاحتقان وممكن يخلي الممرات الأنفية تلتهب، الأحسن نتجنب أي أكل فيه خل لحد ما نخف تماماً

تعليقات فيسبوك