in

14 استخدام جديد للحاجات اللي في مطبخك

لو فاكرين ان كل حاجة في المطبخ ليها استخدام واحد تبقوا غلطانين جداً، في حاجات كتير ممكن نستخدمها بأكتر من شكل وهتقوم بدور أدوات مختلفة تماما، اعرفوها عشان ماتعطلوش مهما حصل!

1# الفويل الألومونيوم بينضف الحلل

عايزين نغسل حلة ستانلس ومعندناش سلك مواعين؟ هنكرمش حتة من الفويل قد قبضة الإيد وندعك بيها الحلة. (طبعا ما نجربش الطريقة دي مع التيفال)

2# الخل بيشيل بقع العرق

أي بقع عرق في الهدوم هنطلعها بسهولة بعد كده، ربع كوباية خل مع كوباية مياه ونحطهم على بقعة العرق ونسيبها تتنقع دقيقة ونغسلها بشكل عادي


3# وكمان بيعدّل ريحة الجو

عاملين سمك أو داهنين أوضة والريحة مالية الهوا؟ صبوا شوية خل في كوباية أو بولة واسعة وسيبوها في المكان اللي فيه الريحة نص ساعة وهيمتص أي روايح ويخلي الجو طبيعي

4# الليمون بيطلّع بقع الحبر

ننقع أي بقعة حبر في عصير ليمون 5 أو 10 دقايق قبل ما نغسلها والأحماض الي في الليمون هتشيل بقعة الحبر من غير أي مجهود

5# الدقيق بينضف الشعر

ممكن نغسل الشعر بالدقيق كبديل طبيعي للشامبو، الدقيق بيمتص أي زيوت زيادة وبينضف الشعر ويخلي شكله فريش وصحي



6# السكر بيشيل بقع العشب

الإنزيمات في السكر بتكسر الكوروفيل اللي بيخلي العشب يبقع هدومنا بالأخضر، هنخلط ربع كوباية سكر مع شوية مياه دافية عشان نعمل معجون ونحطه على البقعة نص ساعة قبل الغسيل

7# اللبن بيلمع الجلد!

الجلود اللي بتتلمع زي جلد الجزم والشنط نقدر نلمعها ونحافظ عليها باللبن! هنبل أي قماشة قطن نضيفة بشوية لبن ونمسح بيها الجلد في حركة دائرية واللبن هيلمع الجلد ويطرّيه. بعدها هنمسح الجلد بقماش ناشف عشان نشيل أثر اللبن من عليه

8# السفنج بيحافظ على الصابون

الصابونة بتبوش وبتخلص بسرعة؟ جربوا تحطوا سفنجة تحتها، هتخلي الصابونة تنشف بسرعة وتمنع انها تبوش على الفاضي

9# البيكينج صودا بيلمع المواعين

معلقتين كبار بيكينج صودا مع سائل المواعين هيخليه ينضف بشكل أحسن ويطلع الدهون بسهولة

10# الفازلين بيمنع الصدأ

ادهنوا أي حاجة معرضة للصدا زي المسامير وغيرها من الأدوات المعدنية بطبقة رقيقة من الفازلين، هيعزل الرطوبة والهوا اللي بيسببوا الصدا ويحافظ على المعدن

11# الشامبو بيغسل المواعين

لو صابون المواعين خلص نقدر نغسلهم بالشامبو، خصوصا الشامبو العادي، هيكون مناسب جداً

12# البيكينج صودا بينضف الصيني

لو لون الصيني بتاعنا اتغير شوية مع الاستخدام، هنحط قماشة مبلولة في البيكينج صودا وندعك بيها الصيني عشان ننضفه ونشيل أي بقع من عليه، بعد كده نغسل الصيني عادي وننشفه

13# وكمان هيخلصنا من الحشرات

لو في أي حشرات في البيت، هنخلط كمية من البيكينج صودا مع قدهم سكر ونوزعهم عند زوايا المكان، الحشرات هتنجذب للسكر لكن مش هيقدروا يهضموا البيكينج صودا وهيموتوا

14# قشر الموز بيلمع الفضة

هنحط قشر الموز في الخلاط مع شوية مياه عشان نعمل معجون، ونحط قماشة نضيفة في المعجون وندعك بيها الفضة بعدين نغسل الفضة في مياه ونشوف اللمعان