in

13 أكلة مهمة لازم ناكلهم باستمرار في الصيف

13 أكلة مهمة لازم ناكلهم باستمرار في الصيف

الحر الشديد والشمس والرطوبة العالية بيخلوا الجسم محتاج تغذية معينة في الصيف عشان يبقى أقوى ومترطب أكتر وفيه فيتامينات تحميه من المشاكل اللي بيسببها الجفاف. هنقولكم أحسن 13 أكلة يغذوا الجسم ويحموه في الصيف.

1# الطماطم

الطماطم غنية بفيتامين C ومضادات الأكسدة وبتساعد في تدعيم الجسم وحمايته من آثار الشمس والأمراض المزمنة.

2# الأفوكادو

الأفوكادو مصدر مهم لفيتامين د والدهون الأحادية الغير مشبعة، بيدعم صحة القلب والجسم بصفة عامة وبيحمي من أمراض كتير وبيساعد البشرة في علاج آثار الشمس الضارة وحمايتها منها


3# البطيخ

البطيخ مليان مياه وده بيخليه فاكهة مثالية لترطيب الجسم وحمايته من الجفاف في الصيف، وبيشبع في نفس الوقت لإنه غني بالألياف، زائد إنه بيساعد على حماية الجسم من أضرار الشمس لإنه غني باللايكوبين

4# الزبادي

أكلة مرطبة للجسم وبتدعم صحة الجهاز الهضمي وغنية بالبروتين. ميزة الزبادي إننا ممكن نعمل منه وجبة متكاملة ومشبعة وناكله ساقع ومنعش في نفس الوقت، زي الزبادي بالشوفان أو مع الفواكه، وجبة غذائية منعشة ممكن ناخدها في أي مكان!

5# الكرفس والشمر

الكرفس والشمر من أكتر الخضرة المدرة للبول، وده مهم جدا لحمايتنا من الإنتفاخ أو تراكم وزن المياه في جسمنا. لكن ميزتهم المهمة هي إنهم ما بيهددوش الجسم بالجفاف لإنهم بينشطوا وظايف الكلى وبالتالي الجسم بيطرد الفضلات والسوائل الزايدة من غير ما يفقد ترطيبه.



6# الشمام والكانتلوب

الكانتلوب والشمام مليانين مياه وألياف بنسب مخلتفة، زائد إنهم مدرين للبول وبيساعدوا الجسم يتخلص من الفضلات اللي بتسبب الخمول والتعب. ميزة كمان إنهم بيساعدوا في تقليل تقلبات الهرمونات عند الستات.

7# التوت والفراولة

أنواع التوت المختلفة والفراولة غنية بفيتامين C والألياف اللي بتغذي الجسم وبتقويه ضد آثار الشمس وبتقلل حساسية البشرة للضوء الشديد اللي بنتعرض له طول نهار الصيف.

8# المكسرات

المكسرات مصدر مهم للدهون الغير مشبعة اللي بتقلل نسبة الكوليسرتول في الدم، نقدر نقزقزها بدل التسالي المملحة اللي هتتعب صحتنا أكتر مع الحر.

9# الكوسة

الكوسة غنية بالألياف اللي بتغذي الجسم وتدعم صحة القلب وبتقلل مستوى الكوليسترول في الدم، زائد إنها خفيفة على الجسم ومش هتسبب أي خمول أو تعب.

10# الشاي الأخضر

مشروب مرطب جدا للجسم وبيحافظ عليه من الجفاف وبيحمي من أمراض كتيرة. الجميل إننا نقدر نشربه بارد أو حتى متلج زي أي عصير ومش هيخسر فوايده أو قيمته الغذائية .

11# السلمون

السلمون من أكتر الأسماك الغنية بالبروتين والأوميجا 3 والدهون الأحادية الغير مشبعة وده بيخليه صحي جدا وبيساعد في الحماية من الآثار الضارة للحرراة والشمس، والأهم انه وجبة خفيفة على المعدة.

12# السلطة الخضرا

خضرة السلطة زي الجرجير والخس والبقدونس والكزبرة وغيرهم فيهم فوايد متنوعهة بين الفيتامينات والألياف والحديد والترطيب للجسم. غير الخضرة زي الجزر والطماطم والخيار، مع بعض بيخلوا طبق السلطة أكلة مهمة جدا لتنشيط الجسم وحمايته من آثار الشمس والتعب والخمول بسبب الحر.

13# فاكهة الصيف

التين والتفاح والكمترى والمشمش والخوخ وغيرهم، فاكهة الصيف كلها ألياف وبتساعد على ترطيب الجسم جدا وكل فاكهة غنية بفيتامينات بتدعم البشرة وتحميها من آثار الشمس والحرارة.