in

12 حاجة مابنستعملهاش صح!

صعوبات كتير بتواجهنا في المطبخ ممكن يكون سببها إننا بنتعامل مع الأكل أو أدوات الطبخ غلط من غير ما نعرف! هنقولكم على أكتر حاجات هتبقى أسهل بكتير لما نستخدمها صح وهتسهّل عليكم الحياة مع الأكل.

1# الخلاط

السبب في إن الخلاط بيقف كل شوية ونحاول نرجه ونقلب المكونات فيه هو إن ترتيب المكونات غلط. لازم نحط السوايل الأول وبعدها المكونات الطرية وآخر حاجة المكونات الجامدة زي التلج مثلاً – بعيد عن شفرات الخلاط، وبكدة هنحافظ على الخلاط وهيشتغل أسرع بكتير

2# علب تخزين الأكل

مش كل علب الأكل مناسبة للميكروويف، زوايا العلب المربعة أو المستطيلة بتجذب الحرارة أكتر من باقي العلبة وده بيخلي أطراف الأكل تسخن أكتر من اللازم وممكن تتحرق، الأحسن اننا نستخدم علب الأكل المدورة عشان توزيع الحرارة يكون متساوي


3# أزايز الكاتشب

بدل ما ندق على قعر إزازة الكاتشب كتير لحد ما ندلق نصها مرة واحدة، نقدر نخلي الكاتشب ينزل بالكمية المطلوبة بإننا نخبط على أول رقبة الإزازة، عند علامة 57 مثلا في أزايز هاينز، والكاتشب هينزل بسلاسة وبسرعة

4# سكاكين المطبخ

ناس كتير بتمسك سكاكين المطبخ غلط وده بيخلي استخدامها أصعب وممكن يسبب لهم جروح، المفروض نمسك إيد السكينة بحيث تكون السبابة والإبهام ماسكين السكينة من الجنبين عشان نتحكم فيها بشكل أحسن

5# الموز

كتير بنهرس راس الموزة واحنا بنحاول نقشرها، ده لإننا بنقشرها من فوق! لو مسكنا الموز بالعكس هنلاقي ان تقشيره أسهل بكتير لإن دي الطريقة الصح لتقشيره في الأساس



6# إيد الحلة والمعالق الخشب

أوقات كتير بنحتار نحط المعالق الخشب أو المغرفة فين بعد منقلب حاجة بنطبخها مع إن ممكن تكون الحلة نفسها فيها مكان للمعلقة أو المغرفة واحنا مش واخدين بالنا!

7# شواية الفرن

الفرن المقفول بالكامل بيحبس البخار جواه، لكن لو بنشوي حاجة المفروض نسيب مساحة لخروج البخار من الفرن عشان المشويات تطلع مظبوطة ومقرمشة من غير مالأكل يعدي درجة السوى المطلوبة

8# علب العصير

الأجزاء اللي في علب العصير من الجنب هي في الحقيقة إيدين عشان علبة العصير تتمسك منها بدل ما نضغط على العلبة بإيدينا والعصير يتدلق منها

9# الكانز

فتاحة الأزايز اللي بتتعلق في المفاتيح زي ما في الصورة فيها جزء مصمم لفتح الكانز، بدل ما نكسر ضوافرنا عشان نفتحها!

10# غطا الكوباية البلاستيك

غطيان كوبايات التيك اواي مصممة على إنها تتحمل ضغط الكوباية، هنقلب الغطا ونثبت الكوباية في نصه وبكده نقدر نستخدمه ككوستر تحت الكوباية

11# زبدة الفول السوداني

لما نخزن علبة زبدة الفول السوداني المفروض نقلبها عشان تفضل بحالة كويسة وما تكتّلش و تعمل طبقة زيت على الوش

12# الفراولة

بدل ما نقطع ورق الفراولة بالسكينة ونشيل معاه شريحة من الفراولة، نقدر نشيل الورق بإننا ندخل شاليموه في الفروالة من تحت ونزقه لفوق وهو هيشيل الورق، ونستخدم نفس الطريقة مع بذر الكريز