in

11 نوع توابل وأعشاب للأكل مش هتصدقوا فوايدهم!

11 نوع توابل وأعشاب للأكل مش هتصدقوا فوايدهم!

توابل الأكل والخضرة اللي بنحطها عشان الطعم ليها دور أكبر من كده بكتير! شوفوا ازاي المكونات البسيطة دي بتدعم صحتكم بفوايد مدهشة مع نكهتها اللي بتخلي الأكل أطعم!

1# الكركم مضاد قوي للالتهابات وبيحمي من الشيخوخة المبكرة!

الكركم فيه مواد مفيدة كتير أهمها مادة الكركمين اللي تعتبر مضاد التهابات قوي لدرجة ان ليه نفس تأثير بعض الأدوية المضادة للالتهابات! الكركمين كمان مضاد للأكسدة وده بيحمي الجسم والبشرة من الشيخوخة المبكرة وأمراض تانية كتير.

2# القرفة بتقلل سكر الدم وبتزود معدل الحرق!

القرفة ليها فوايد كتيرة منها إنها بتزود معدل حرق الدهون في الجسم، غنية بمضادات الأكسدة، بتساعد في محاربة الالتهابات وبتقلل نسبة الكوليسترول والدهون الثلاثية في الجسم.
لكن الفايدة الأكبر للقرفة هي إنها بتقلل مستوى السكر في الدم حتى عند مرضى السكر! القرفة بتحسن حساسية الأنسولين وبتقلل نسبة سكر الصيام بنسبة بين 10ـ 25% عند مرضى السكر. أنسب كمية للقرفة من نص معلقة صغيرة لمعلقتين صغيرين يومياً.


3# المرمرية بتقوي الذاكرة وتحسن أداء المخ!

من العصور الوسطى كانت المرمرية بتستخدم لأهداف علاجية، لكن الدراسات الحديثة أثبتت أكتر إن أكبر فايدة ليها هي إنها بتساعد في تحسين وظايف المخ وتنشيط وتقوية الذاكرة. التأثير ده مش بس على الناس اللي صحتها كويسة سواء شباب أو مسنين، المرمرية بتحسن ذاكرة مرضى الزهايمر وبتقوي وظايف المخ عندهم! شوفوا كمان أكتر 8 أكلات بتحسن صحة المخ

4# الشطة بتساعد في خسارة الوزن وبتحمي من قرحة المعدة!

الشطة أو الفلفل الأحمر المطحون فيه مادة فعالة اسمها كابسايسين، المادة دي بتقلل الشهية للأكل وبتزود معدل حرق الدهون عند الناس اللي ما بياكلوش فلفل بانتظام، عشان كده بتدخل في تركيبات كتير للتخسيس. لكن مش هتدي نفس التأثير للناس اللي متعودين ياكلوا شطة في الأكل. كمان الشطة بتقتل البكتيريا وبتحفز الخلايا الموجودة في المعدة وده بيحمينا من قرحة المعدة.

5# النعناع بيقلل ألم القولون العصبي!

النعناع بيساعد على استرخاء عضلات القولون وده بيخفف ألم القولون العصبي وبيقلل الشعور بالانتفاخ والشعور بالقيء اللي بتسببه مشاكل القولون والجهاز الهضمي. كمان بيقلل إحساس القيء بعد الجراحات والولادة القيصرية.



6# الجنزبيل بيعالج الكحة والبلغم ومسكن للألم!

دراسات كتير أثبتت إن الجنزبيل علاج فعّال للكحة والبلغم لإن فيه مواد مضادة للالتهابات بتساعد في التخلص من التهاب الشعب الهوائية. الجنزبيل يعتبر مسكن ممتاز للألم لدرجة إنه بيستخدم في بعض الحالات بدل أدوية زي الأسبرين والبروفين!

7# الحلبة بتظبط مستوى السكر في الدم وبتقلل ألم الدورة الشهرية!

الحلبة فيها بروتين نباتي مهم جدا اسمه “هيدروكسي إيزولوسيني” وده بيحسن أداء هرمون الأنسولين في الجسم، وبالتالي بتظبط مستوى السكر في الدم وبتساعد مرضى السكر بشكل كبير. كمان بتخفف ألم التشنجات في فترة الدورة الشهرية!

8# الروزماري بيساعد في منع وعلاج الحساسية والاحتقان!

عشبة الروزماري فيها حمض اسمه روزمارنيك ليه خصائص مضادة للالتهابات بتساعد في تهدية وعلاج الحساسية واحتقان المناخير والوقاية منهم.

9# الثوم بيحمي من أمراض كتير وبيحسن صحة القلب!

ريحة التوم القوية بتيجي من مركب اسمه الأليسين ليه فوايد صحية مدهشة! الثوم بيقوي جهاز المناعة وبيساعد في علاج نزلات البرد. كمان بيقلل مستوى الكوليسترول وبيساعد في تقليل ضغط الدم عند مرضى الضغط العالي لدرجة إن في دراسة بتقول إن ممكن يكون ليه نفس تأثير دوا الضغط!

10# الريحان بينظم وظايف الكبد ويحارب البكتيريا!

الريحان بيساعد في إفراز إنزيمات بتساعد في تنضيف الجسم من السموم وتنظيم وظائف الكبد. زائد إن فيه مواد مضادة للالتهابات بتساعد في منع عدوى البكتيريا والفيروسات!

11# الكمون بيحسن الهضم  وبيخلي البشرة أكتر نضارة!

الكمون مفيد جدا في تحسين عملية الهضم وتخفيف الانتفاخ والغازات وحتى الوقاية من البوايسر والمساعدة في علاجها! كمان فيه فيتامين E المهم جدا لصحة ونضارة البشرة. غير إن فيه نسبة من فيتامين C اللي بيعزز مناعة الجسم وبيساعد في تجنب الفيروسات والبكتيريا.