in

11 حاجة مينفعش تتخزن في الفريزر

الفريزر اختراع هايل نخزن فيه الأكل ني أو مطبوخ لأسابيع أو شهور وما يحصلوش حاجة، لكن للأسف مش لكل أنواع الأكل. شوفوا معانا أنواع الأكل اللي بتبوظ لما تتخزن في الفريزر

1# اللبن

اللبن

تجميد اللبن بيخلّي جزء منه يتكتّل لما يذوب (لو ما اتغلاش في ساعتها) والباقي بيبقى خفيف زي المياه، هيكون صالح للشرب لكن طعمه وقوامه هيغيروا طعم أي حاجة هنستخدمه فيها.

2# الفاكهة والخضار النيّ

الفاكهة والخضار

أي خضار أو فاكهة فيها تركيز مياه كبير زي الخيار والكانتلوب لو دخلوا الفريزر المياه اللي فيهم هتتجمد ولما التلج يفك هيبقوا بايشين جدا مايتاكلوش


3# اللحوم اللي كانت مجمدة وفكّت

اللحوم المجمجدة

اللحوم المجمدة لما تفك بتكون عرضة للبكتيريا أكتر من اللحوم اللي مادخلتش الفريزر، عشان كده لما اللحمة تفك لازم نسوّيها كويس وناكلها أو نحطها في الفريزر بعد ما الحرارة تقتل البكتيريا اللي فيها

4# البطاطس النية

البطاطس

البطاطس فيها مياه كتير فا تخزينها في الفريزر هيخليها طرية جدا، لكن البطاطس بعد طبخها أو البطاطس المسلوقة سلق خفيف (زي البطاطس الجاهزة للتحمير) ممكن نحطهم في الفريزر من غير قلق

5# الأكل المقلي

الأكل المقلي

الأكل المقلي/المحمر لو اتجمد هيطرى جداً وهتروح قرمشته، ومحدش هيحب ياكل مقليات طرية!



6# المكرونة

المكرونة

المكرونة الخارجة من الفريزر مش مضرة بالصحة بس غالبا مش هنحب ناكلها لأنها هتبقى معجنة جدا

7# الزبادي

الزبادي

صحياً نقدر نخزن الزبادي في الفريزر قبل ما صلاحيته تنتهي ومش هيقتل البكتيريا المفيدة اللي فيه، لكن للأسف لما نخرجه من الفريزر هيبقى مكتل ومش كريمي زي الزبادي الفريش

8# الجبن الطرية

الجبنة

زي اللبن، الجبنة الطرية المتجمدة لما تفك هتكوّن كتل مليانة مياه وطعمها هيتغير

9# البيض بقشره

البيض

نسبة المياه اللي في البيض هتتمدد لما يتجمد وممكن تكسر قشرة البيض وتعرّضه للبكتيريا، لو عايزين نخزن البيض في الفريزر لازم نخرجه من قشره ونضربه كويس جدا ونخزنه في حافظة بتتقفل كويس

10# الثوم

ناس كتير بتخزن الثوم متقشر ومهروس في الفريزر، بس طعمه ممكن يمرّر لما يتجمد وممكن يأثر في طعم الأكل

11# المايونيز

المايونيز

ماتحاولوش تشتروا كميات كبيرة من المايونيز على أمل تخزينه في الفريزر لإنه لو اتجمد هيكتل ومش هيبقى القوام الكريمي اللي بنحبه

تعليقات فيسبوك