in

11 بديل سهل هيخلوا أكلك صحي أكتر

لو عايزين نعمل نظام غذائي صحي عشان نخس أو نحسن صحة جسمنا، في حاجات بسيطة هتخلي أكلنا العادي صحي أكتر من غير من نضحي بالطعم اللي بنحبه

1# المسطردة بدل المايونيز

بدل ما نحط معلقة مايونيز فيها 90 كالوري على الأكل نقدر نبدلها بمعلقة مسطردة، طعمها لذيذ مميز ومن غير كالوريز

2# القرفة بدل السكر

لما نبدأ يومنا بسكريات بنخلي الجسم يطلبها طول اليوم، فبدل ما نحط سكر أيا كان نوعه، جربوا القرفة كبديل هيدي طعم حلو وفي نفس الوقت هتنظم الجلوكوز في الدم


3# الفاكهة بدل العصير

كباية عصير الفاكهة مابيكونش فيها كمية الألياف ولا القشراللي في الفاكهة وده بيضيع جزء كبير من القيمة الغذائية اللي فيها، الأصح اننا ناكل الفاكهة فريش بدل العصير، وبكده بنقلل الكالوريز كمان

4# الشوفان بدل الكورن فليكس

الشوفان مليان فوايد صحية للقلب والجسم زائد إنه مشبع جداً، نقدر ناكله بدل الكورن فليكس اللي معظمه سكريات

5# القهوة السادة بدل القهوة بلبن

وقت ما نحتاج كفايين نشرب قهوة سادة (من غير لبن) ونوفر على نفسنا الكالوريز الزيادة



6# الاطباق المتوسطة بدل الكبيرة

الطبق اللي حجمه أصغر بيوفر لنا 20% من الكالوريز اللي ممكن ناكلها لو أكلنا في طبق كبير

7# المسلوق بدل المقلي

بدل ما نبدأ يومنا بزيوت تزود الوزن وتأثر على الجسم، نقدر نسلق البيض بدل ما نقليه ونبقى قللنا الكالوريز وخليناه فطار صحي ومفيد

8# صلصة الطماطم بدل الوايت صوص (الصلصة البيضا)

الوايت صوص غالبا بيبقى مليان زبدة وكريمة طبخ وجبنة وزيوت تقيلة، لكن صلصة الطماطم أغلبها خضار فتعتبر صحية أكتر والكالوريز اللي فيها أقل

9# الفشار بدل الشيبسي

لما نحب نقزقز حاجة  سريعة بين الوجبات ممكن ناكل فشار سادة أو ملحه خفيف ونبقى أكلنا تسالي خفيفة مليانة ألياف طبيعية ومضادات أكسدة وبكالوريز أقل بكتير من الشيبسي اللي كله أملاح ودهون وكالوريز من غير قيمة غذائية!

10# زيت الزيتون البكر بدل الزيت العادي

زيت الزيتون من أكتر الزيوت الصحية لأنه غني بمضادات الأكسدة والدهون الأحادية الغير مشبعة اللي بتساعد في خسارة الوزن وبتنظم مستوى الكوليسترول في الدم وكمان بتحمي من أمراض القلب

11# الصلصة البيتي بدل المعلبة

الصلصة المعلبة مليانة املاح وسكريات ومواد حافظة ضارة، لكن لما نعمل الصلصة في البيت من الطماطم والخضار اللي نحب نضيفه ونتحكم في التوابل والأملاح اللي فيها هنبقى بنتجنب أضرار الصلصة المعلبة وكمان بناخد الفيتامينات الاساسية ومضادات الأكسدة من الطماطم والخضار الفريش