in

‏11 استخدام عبقري للنشا مش هتستغنى عنهم!‏

لو بتستخدموا النشا في الطبخ بس هتعرفوا معانا إن فايتكم كتير!

1# النشا ممكن يساعدنا نفك العقد

لو عندنا أي عقدة في رباط الجزمة أو أي رباط تاني ومش عارفين نفكها، رشوا عليها شوية نشا وشوفوا ازاي هتخلي العقد تتفك أسهل بكتير

2# بيشيل بقع الدهون من الحيطة

حيطان المطبخ بتتبقع كتير بسبب دهون الطبخ؟ ما تقلقوش، نقدر ننضف الحيطة من الزيوت والدهون بكل سهولة بإننا نرش شوية نشا على حتة قماش مبلولة وندعك بيها البقع بالراحة وهتنضف الحيطة من غير ما تأثر على الدهان ومن غير مجهود


3# بيلمع الفضيات

لما الفضة تتطفي مع الاستخدام، هنعمل عجينة خفيفة من النشا والمياه ونحطها على قطعة قماش مبلولة ونلمع بيها الفضة ونسيبها لحد ما تنشف وبعدين ننشفها وهنلاقي الفضة بتاعتنا بتلمع كإنها جديدة

4# بيشيل بقع الدم

كل ما لحقنا البقعة قبل ما تنشف يكون أحسن، هنعمل عجينة طرية من النشا والمياه الساقعة وندعك بيها البقعة ونسيب الهدوم أو القماشة المبقعة في الشمس لحد ما تنشف، مجرد ما عجينة النشا تنشف هنفرك الهدوم عشان نطلع بقايا النشا منها ولو لسه فيه بقايا للبقعة هنكرر الطريقة دي تاني

5# مزيل عرق طبيعي

النشا بيمتص الرطوبة بشكل هايل ونقدر نستفيد منه فإننا نعمل مزيل عرق طبيعي، هنخلط 3 معالق كبيرة زيت جوز هند مع معلقتين كبار بيكينج صودا ومعلقتين كبار نشا ونخلطهم كويس وبقى عندنا مزيل عرق فعال من مكونات طبيعية!



6# تنضيف السجاد

السجادة اللي بنحبها وقع عليها حبر وبقعها؟ بسيطة، هنجيب شوية لبن ونخلط معاهم شوية نشا عشان يعملوا عجينة طرية، ونحطها على البقعة ونسيبها تنشف كام ساعة وبعدين نفرك العجينة الناشفة ونكنس السجادة واتحلت المشكلة!

7# وبيخلي ريحة السجاد فريش!

قبل ما تكنسوا الأوضة رشوا شوية نشا على السجاد وسيبوه حوالي نص ساعة، واكنسوا بعدها من غير خوف من ريحة التراب في الجو

8# مانيكير ماط (مطفي)

بما إن الماط بقى موضة منتشرة وشيك، ممكن نخلي أي مانيكير عندنا يبقى ماط لو خلطناه بالنشا، هنقلب كمية بسيطة من النشا مع المانيكير في طبق ورق أو بلاستيك وبعدها نحط المانيكير على ضوافرنا على طول

9# بيشيل أثر الشياط من الهدوم

أي هدوم اتلسعت مننا بالمكواة نقدر نطلع أثر اللسعة منها بإننا نبل الجزء الشايط ونحط عليه نشا ولما تنشف نمسح النشا وأثر اللسعة هيطلع

10# بيحافظ على الرجلين

الكتمة وعرق الرجلين في الجزمة بيسببوا ريحة وحشة وممكن يسببوا اننا نصاب بفطريات في رجلينا، لكن نقدر نبعد المشكلة دي بإننا نرش شوية نشا في الجزمة عشان تمتص الرطوبة، ونودع الريحة الوحشة !

11# البودرة الشفافة

عايزين نخلي المكياج طبيعي ومفيهوش لمعة زيادة لكن الباودر الشفاف غالي؟ ليه نشتريه لما ممكن نعمله؟ هنحتاج نص معلقة كبيرة نشا مع معلقة صغيرة بودرة تلك الأطفال العادية ونخلطهم كويس في علبة بتتقفل ومبروك علينا البودرة الجديدة!