in

10 أكلات نبعد عنهم قبل النوم!

10 أكلات نبعد عنهم قبل النوم!

كل وقت وله أكله. أكلات كتير عادية أو حتى صحية لكن مش مناسب ناكلها بالليل! لو عرفناهم هنقدر نتجنب مشاكل كتير زي الأرق ومشاكل الهضم وتراكم الدهون في الجسم!

1# الآيس كريم

كلنا بنحب ناكل حاجة حلوة وساقعة بالليل تساعدنا على النوم في الحر ده، لكن المشكلة إن الآيس كريم فيه دهون وسكريات كتير مينفعش ناكلها بالليل لإن الجسم مش هيلحق يحرقها، وهتتخزن كدهون في الجسم. كمان السكريات بتدي الجسم طاقة عالية بشكل سريع، وبكده نكون بنلخبط جسمنا وبنرهقه زيادة!

2# الكرفس

الكرفس صحي جدا ومفيد جدا بس بلاش قبل النوم. الكرفس مُدر للبول بشكل كبير لإنه بينقي الجسم من السموم، وبالتالي أكل الكرفس قبل النوم هيخلينا نحتاج الحمام طول الليل وده هيأثر على نومنا وراحة جسمنا.


3# المكرونة

رغم إن المكرونة تعتبر أكلة سريعة وكتير بيشوفوا إنها طبق خفيف ومش متعب في الهضم، لكن ماتنفعش بالليل. المكرونة عبارة عن كربوهيدرات، لما ناكلها بالليل جسمنا هيخزن الكربوهيدرات دي كلها على شكل دهون. زائد إن الإضافات اللي على المكرونة زي الصلصة أو الجبنة وغيرهم ممكن يسببولنا الحموضة وعسر الهضم بالليل!

4# البيتزا

شريحة واحدة مش هتعمل حاجة؟ غلط. البيتزا مليانة مكونات تسبب الحموضة ومحتاجة من المعدة مجهود عشان تتهضم كويس. أكلها بالليل بيجهد المعدة وممكن يسبب اضطرابات في الهضم وبالتالي اضطرابات في النوم! غير طبعا الدهون اللي هتتراكم في الجسم.
شوفوا كمان 9 تكاّت يخلوا البيتزا البيتي زي بتاعة المطاعم!

5# الحلويات

السكريات الصناعية اللي في الحلويات مش خيار مناسب أبداً قبل النوم. الدراسات أثبتت إن حوالي 70% من اللي بياكلوا حلويات قبل النوم معرضين للكوابيس والأرق أكتر من غيرهم! السبب إن جرعة السكر الكبيرة بتخلق موجات دماغية نشيطة أكتر وبالتالي بتعرضنا للكوابيس لما ننام.



6# التوم

التوم يعتبر من الأعشاب الحارة، ليه نفس تأثير التوابل الكتير في الأكل، الاتنين بيسببوا حرقان في المعدة وصعوبة في الهضم واحتمال كبير للغازات. أكل التوم بالليل ممكن يسبب حرقان في المعدة والمريء وحموضة شديدة. زائد الريحة الوحشة اللي بيسببها! شوفوا كمان 7 أكلات بيسببوا الريحة الوحشة للجسم

7# الشوكولاتة الدارك

الناس اللي بتحب تبعد عن السكريات في الشوكولاتة العادية بيشوفوا إن الشوكولاتة الدارك أحسن. بس مش بالليل! الشوكولاتة الدارك فيها نسبة عالية من الكافيين والثيوبرومين، الاتنين يعتبروا منشطات قوية للقلب والدماغ. مش بس هيسببوا الأرق واضطراب النوم، كمان ممكن يأثروا على معدل ضربات القلب.

8# اللحوم

اللحوم بتحتاج وقت طويل للهضم. أكلها بالليل هيخلي الجهاز الهضمي شغال طول الليل ويستهلك مجهود كبير وبالتالي الجسم مش هياخد الراحة اللي محتاجها في النوم. لازم ناكل اللحوم في وقت بدري مش بالليل ولو بكميات صغيرة عشان ما نتعبش جسمنا ونعرضه للدهون الزيادة!

9# عصير البرتقال

عصاير الفواكه عموما مش أنسب اختيار بالليل، لإن فيها نسبة سكريات ممكن تخلينا ننام بصعوبة. لكن عصير البرتقال تحديدا من أكتر الحاجات اللي لازم نبعد عنها بالليل لإنه مش بس سكريات، كمان مليان أحماض ممكن تسبب لنا الارتجاع ومشاكل في الهضم قبل النوم.

10# المشروبات الغازية

أي حاجة فيها صودا (حتى لو كانت دايت ومفيهاش سكر) ما تنفعش قبل النوم. الصودا فيها نسبة كافيين وغازات مينفعش ناخدها بالليل ونتعب الجهاز الهضمي بيها.