in

‏16 غلطة بنعملها في المطبخ

في غلطات بنعملها في المطبخ تبان إنها بسيطة لكن تأثيرها بيبقى كبير. لو صلحناها حياتنا في المطبخ هتبى أسهل وأأمن بكتير!

1# ما بنسنش السكاكين

معظمنا بينسى أو يكسل يسن سكاكين المطبخ ويستخدمها فترة طويلة وهي باردة، برغم إن السكينة الحامية هتوفر وقت وجهد وتخلي عملية التقطيع سلسة. وكمان، أأمنلنا بكتير من السكاكين الباردة اللي بنضطر نضغط عليها أكتر من اللازم وتتزحاق وتعورنا! السكاكين لازم تتسن كل 4 شهور أو 6 شهور بالكتير أوي.

2# بنحط حاجات سخنة في الخلاط

بخار الحاجة السخنة اللي بنحطها في الخلاط بيعمل ضغط أعلى جواه وممكن يطير الغطا وتنفجر الحاجة السخنة علينا وتسبب لنا حروق شديدة. لازم نخلي الحاجة تبرد شوية قبل ما نحطها


3# تقطيع اللحوم قبل الخضار

محدش هيفكر إنها فارقة، لكن لما نقطع الخضار قبل اللحوم مش بس هنوفر وقت غسل القطاعة كذا مرة، وكمان هنتجنب نقل أي جراثيم من اللحمة للخضار.

4# تحضير المكونات واحنا بنطبخ

عشان نوفر الوقت ونضمن إن كل حاجة في الأكلة تطلع مظبوطة، لازم نكون مجهزين المقادير والأدوات اللي هنحتاجها قبل ما نبدأ في الطبخ مش نقطع ونحضر كل مكون واحنا بنطبخ

5# ما بننضفش التلاجة بإستمرار

المفروض ان التلاجة تتنضف أسبوعياً، لكن لو ده هيكون تقيل علينا ممكن ننضفها تنضيف كامل مرة في الشهر، وطبعا لو أي حاجة اتدلقت لازم نمسحها في ساعتها عشان نمنع إنتشار البكتيريا لبقية الأكل ونتجنب الامراض.



6# مابندوقش الأكل

الناس اللي بتقول ما تدوقش الأكل غير لما يجهز غلطانين جدا! لازم طول ما احنا بنطبخ ندوق الاكل بعد كل إضافة عشان نتأكد اننا ماشيين على الوصفة صح

7# بنسيح اللحمة على رخامة المطبخ

أكتر حاجة غلط هي اننا نسيب اللحمة على الرخامة تلم بكتيريا وجراثيم, أسلم طرق نسيح بيها اللحمة هي اننا نحطها في التلاجة قبل ما نطبخها بيوم أو في مياه ساقعة أو في المايكروويف على درجة حرارة قليلة

8# بنستخدم نفس السفنجة فترات طويلة

لو بنغسل المواعين كل يوم لازم نغيرالسفنجة لواحدة جديدة على الأقل مرة كل شهر (أو كل 30 يوم إستعمال) لأان سفنج المواعين بيجمع بكتيريا كتير جداً وهينقلها لأي حاجة بيلمسها!

9# بنحط الأكل في الفرن قبل ما يسخن

لازم نصبر على الفرن لحد ما يسخن لإن الأكل اللي بيستوي في الفرن، وخصوصا المخبوزات، مش هيطلع مظبوط لو دخل الفرن قبل ما يسخن

10# بنفتح الفرن على الأكل كل شوية

كل مرة بنفتح فيها الفرن عشان نبص على الأكل بندخّل الهوا الساقع في الفرن وده بيأثر على سرعة سوى الأكل وممكن يسبب انه ما يتظبطش زي الكيكة اللي بتهبط لو فتحنا عليها الفرن بدري، المفروض نسيب الأكل للمدة المطلوبة في الوصفة ومانفتحش الفرن إلا بعد المدة دي

11# بندخل الأكل التلاجة وهو لسة سخن

لما نحط أكل لسة سخن جوة التلاجة على طول هيخللي البكتيريا تنمو فيه بشكل أسرع، لازم نسيبه برة يبرد شوية وما فيش قلق إنه يبوظ في الفترة البسيطة دي

12# بنعاير المقادير بعنينا

لو عايزين الأكل يطلع مظبوط كل مرة لازم نستخدم أدوات القياس، حتى لو فاكرين إننا عارفين معلقة الملح بتبقى قد إيه بالويم بردو هتكون مسألة حظ ولو مش مظبوطة هتفرق في الطبخة كتير!

13# بنحط دريسنج السلطة بدري

الدريسنج هيخلي خضرة السلطة طرية جدا فما ينفعش يتحط بدري، حتى لو هنحضر السلطة قبل ما ناكلها بيوم، نحط الدريسنج قبل ما ناكلها على طول

14# بنقلي الخضار وهو لسة مبلول

معظم الخضار جواه محتوى مياه عالي، لما نشوحه في زيت وهو لسة عليه كمان مياه من برة ممكن يتهرس مننا وكمان المياه أول ماتلمس الزيت السخن حتطرطش زيت في كل حتة وتلسعنا

15# بننسى ننضف الحوض

زي سفنجة المواعين، الحوض غالبا بيتنسي أو بنعتمد على اننا كنا بنغسل فيه يبقى هو كدة نضيف، لكن الحوض لازم يتغسل ويتمسح بحاجة زي بمنظف قوي بعد كل غسلة مواعين عشان نتخلص من البكتيريا

16# بنسيب الثوم على النار كتير

بما إن الثوم بيدخل في معظم الأكلات كان لازم ننبهكم! الثوم بيستوي في حوالي 30 ثانية بس. مينفعش نسيبه على النار أو نشيل عيننا من عليه وإلا هيتحرق على طول ويمرر طعم الأكل