in ,

فوازير رمضان خلصت ليه! 9 من أجمل فوازير رمضان على مر السنين

فوازير رمضان من أشهر برامج رمضان القديمة اللي كانت بدايتها مع نيللي؟ لأ مش نيللي. هتتفاجئوا بتاريخ الفوازير المصرية وتطورها وتنوع الفنانين اللي قدموها طول السنين دي

1# ثلاثي أضواء المسرح

ثلاثي أضواء المسرح هما أول ناس بدأت فوازير رمضان على التلفزيون وقدموها لمدة 3 سنين من 1967 لحد 1970

2# نيللي

بدأت نيللي تقدم فوازير رمضان “صورة وفزورة” سنة 1975 وكانت دي أكبر نقلة للفوازير واستمرت بموسم جديد كان آخرهم “الخاطبة” سنة 1981


3# فوازير عمو فؤاد

قدمها الفنان فؤاد المهندس لمدة 10 سنين في التمانينات وبداية التسعينات مع مجموعة كبيرة من الفنانين زي ليلى طاهر وعلا رامي وفاروق فلوكس وغيرهم

4# فطوطة

فوازير فطوطة اللي قدمها الفنان سمير غانم برضه كانت من أنجح البرامج الرمضانية اللي لسه فاكرينها لحد دلوقتي مع انها استمرت من سنة 1982 لحد 1984 بس

5# شريهان

بدأت شريهان بفوازير ألف ليلة وليلة سنة 1985 واستمرت كل سنة بموسم مختلف لحد 1988 وغابت عن الساحة فترة ورجعت تاني بفوازير حاجات ومحتاجات في رمضان 1994



6# فوازير الفنون

رمضان 1989 كان لفوازير الفنون اللي كانت مليانة استعراضات جميلة من تصميم الفنان محمود رضا وقدمتها بنته شيرين رضا مع الفنان مدحت صالح

7# عودة نيللي

ورجعت نيللي تبهجنا في رمضان تاني من أول سنة 1990 بفوازير عالم ورق وبعدها صندوق عجايب الدنيا سنة 1991 وأام العريف سنة 1993 وموسمين تانيين من الفوازير في 1995 و1996

8# الحلو ما يكملش

تعتبر فوازير الحلو ما يكملش اللي قدمتها الفنانة جيهان نصر سنة 1997 هي آخر الفوازير الرمضانية على التلفزيون المصري بعدما استمرت حوالي 30 سنة!

9# فرح فرح

كان في محاولات كتير للاستمرار في فوازير رمضان اللي بقت من أهم التقاليد المصرية الرمضانية، لكن أغلب المحاولات والأفكار ما اتفنذتش، لحد سنة 2003 لما تم عرض فوازير فرح فرح اللي قدمتها غادة عبدالرازق لكن ما حققتش نجاح زي الفوازير القديمة للأسف

وبعدها بطل التلفزيون المصري ينتج برامج الفوازير الرمضانية، كمان مع انتشار القنوات الخاصة بدأت برامج من نوع تاني تنتشر كل رمضان وما بقيناش ملاحقين على البرامج من كترها!

ورغم كده لسه مع كل رمضان بنحن كلنا ساعة الفطار لفوازير نيللي وشريهان