in

بين الكحك والمقرود.. 7 دول بيحتفلوا بعيد الفطر بعادات مميزة!

رغم إن فرحة العيد واحدة، لكن أشكال الاحتفال بالعيد كتيرة ومتنوعة لإن كل بلد بتحتفل بطريقتها وحسب عاداتها وتقاليدها، وكلهم أحلى من بعض!

1# السعودية

السعودية

أهالي السعودية بيأجروا استراحات في العيد عشان يجمعوا العيلة كلها فيها ويقضوا العيد سوا، بدل التقيد بزيارة بيت معين! أما حلويات العيد عندهم أشهرها المعمول والكليجة اللي بتدوب في البُق!

2# الإمارات

البنات والستات في الإمارات بيستقبلوا العيد بالحنة على ايديهم ورجليهم زي حنة الأفراح وبيعتبروها عادة مهمة للاحتفال بفرحة العيد، وبيقدموا في العيد أكلة اسمها البلاليط وحلويات “اللقيمات” اللي شبه الزلابية عندنا


3# اليمن

أهالي اليمن بيستعدوا للعيد في آخر 10 أيام من رمضان وبيجمعوا الحطب على شكل أكوام عالية ويحرقوه ليلة العيد كتعبير عن فرحتهم، وبيدبحوا قبل العيد ويوزعوا اللحمة على جيرانهم وقرايبهم، والأكلة الشهيرة في العيد في اليمن هي السلتة، أما الحلو  فعندهم بنت الصحن أو السباية وهي عبارة عن شرائح فطير بالسمنة والعسل

4# ليبيا

الناس في ليبيا بيحبوا يلبسوا الزي التقليدي في العيد من أول صلاة العيد لحد آخر اليوم، بيخرجوا من الصلاة يتجمعوا في بيت العيلة  عشان يفطروا مع بعض ويقضوا النهار زيارات عائلية وبيقدموا حلويات زي الدبلة والمقرود والبقلاوة

5# تركيا

الأتراك عندهم لبس معين لعيد الفطر بيلبسوه من قبل صلاة العيد ويقضوا بيه اليوم بعد كده، من التقاليد المشهورة عندهم في العيد زيارة المقابر والدعاء لأمواتهم عشان يحسوا انهم معاهم في العيد، والأطفال بيتجمعوا وبيلفوا على البيوت يعيدوا على أهلها والأهالي بيوزعوا عليهم حلويات أشهرها الجلاش الحلو والبقلاوة والكنافة بالمكسرات



6# السودان

أهالي السودان بيبدأوا تجهيز بيوتهم والحلويات للعيد من نص رمضان تقريبا عشان يحضروا السابليه والكعك والغريبة وباقي الحلويات اللي بيقدموها للضيوف، وبيقضوا أول النهار في الزيارات العائلية والجميل إنهم بيجمعوا بعض ويزوروا المستشفيات عشان يعيدوا على المرضى فيها!

7# مصر

كلنا عارفين مظاهر الاحتفال في مصر من أول الأغاني زي يا ليلة العيد والصواريخ اللي الأطفال بيفرقعوها في الشارع وحلويات العيد زي الكحك والبيتي فور والغريبة اللي بنستناهم مخصوص وأجمل حاجة لما الستات يتجمعوا عشان يعملوا الحلويات دي سوا في السهرة