in

10 أسرار لطبخ الباستا زي الإيطاليين!

الأسرار العشرة لطبخ الباستا الإيطالي مظبوطة

كلنا فاكرين المكرونة أسهل أكلة ممكن نعملها، لكن معظمنا بيعملها غلط! هنقولكم على 10 أسرار  هيخلوكم تحترفوا طبخ الباستا زي الإيطاليين بالظبط.

1# الاسباجيتي ما بتتكسرش

الاسباجيتي اتعملت طويلة عشان تتاكل طويلة، كل اللي محتاجينه اننا نطبخها في حلة كبيرة ونحط مياه كفاية، ولما الاسباجيتي تطرى نقدرنزقها جوة الحلة ونقلبها كلها في المياه بشوكة أو معلقة خشب

2# الملح مايتحطش قبل غليان المياه

الملح حاجة أساسية لطعم المكرونة ومهم لشكلها و انها تستوي بالدرجة المناسبة، لكن ما يتحطش قبل غليان المياه لإنه بيبطأ من غليانها. نستنى المياه تغلي ونضيف الملح ونستنى دقيقة عشان يدوب في المياه وبعدها نحط المكرونة


3# المكرونة تتسلق من غير زيت

زي ما قلنا، الملح هو اللي بيحافظ على شكل المكرونة ويخليها ماتعجنش، الزيت إضافة مالهاش داعي وهتخلي المكرونة مزيتة لما نصفيها

4# المكرونة المفروض ماتستويش أوي

أحسن سوى للمكرونة اننا نخليها فيها شدة بسيطة، يعني تتمضغ بالسنان مش تكون طرية أكتر من اللازم! المكرونة الناشفة بتشبع لوقت أطول وكربوهيدراتها أقل وصحية أكتر من المكرونة المستوية زيادة

5# الكمية المناسبة للفرد 100 جرام

الوجبة المناسبة للفرد من المكرونة 100 جرام، أو 150 بالكتير وهيبقى أكتر من كفاية، يعني كيس المكرونة النص كيلو المفروض يكفي 4 أو 5 أفراد مش أقل من كده



6# كل وصفة ليها مكرونة شكل

كل وصفة مكرونة ليها شكل معين وبيتطلب صوص معين فلازم نمشي على الوصفة ونحضر شكل المكرونة المناسب للصوص بتاعها عشان تطلع مظبوطة

7# لما نعمل الصلصة نبدأ بالثلاثي الأساسي

البصل والجزر والكرفس هما مثلث النكهة في المطبخ الإيطالي خصوصا لو هنعمل صلصة باللحمة، ندبل البصل والكرفس والجزر عشان يدونا أساس قوي للصلصة

8# لازم نحتفظ بمياه السلق

لازم قبل ما نصفي المكرونة نشيل حوالي ربع كوباية من مياه السلق، المياه المنشيّة بتاعة المكرونة هتخلي الصلصة تبقى أتقل وكثافتها مناسبة جدا للمكرونة

9# الصلصة مش هي الأساس

الأساس هو طبق المكرونة والمفروض ان الصلصة مكون إضافي بنحطه، المفروض يغطي المكرونة مش يغرقها

10# العيش بيشرب الصلصة

لو عندنا صلصة زيادة في الطبق نقدر نمسحها بالعيش وناكلها عشان نبق استمتعنا بكل لقمة حرفياً!

تعليقات فيسبوك