in

أهم 8 أجزاء في اللحمة وأحسن طبخة لكل جزء!

أهم 8 أجزاء في اللحمة وأحسن طبخة لكل جزء!

بما إن كل الناس بتنوع في أكلها عشان تعمل لحمة العيد بأكتر من شكل، لازم نعرف إيه هي أجزاء اللحمة المناسبة لكل طريقة طبخ. الأكل هيبقى أحلى بكتير لما نخلي اللحمة المناسبة في المكان المناسب!

1# الرقبة

لحمة الرقبة رخيصة مقارنة بباقي الأجزاء لإن عضمها كتير، والجزء الأخير منها المتصل بالكتف اسمه الدوش. لحمة الرقبة مناسبة جدا للسلق والشوربة والطبيخ والفتة كمان!

2# الكتف

لحمة الكتف فيها نسبة دهون عالية وأنسجة وعضم كتير. لحمة تعتبر خشنة، بمعنى انها بتحتاج وقت طويل عشان تستوي. أنسب حاجة للكتف هو السلق أو الطبيخ أو التحمير البطيء في الفرن.


3# الضلوع

معروفة باسم الريش، لحمتها كتيرة وطرية وفيها نسبة دهون معقولة، طعمها مميز جداً، خصوصا الضلوع الأقرب للبطن. مناسبة جدا للشوي والقلي والتحمير في الفرن.

4# بيت الكلاوي

الوسط أو منطقة بيت الكلاوي من أكتر الأجزاء اللي فيها لحمة حمرا وطرية، لحمة الفيليه وعرق الفلتو والإنتركوت كلهم موجودين في منطقة الوسط! أكتر لحمة مناسبة للـ ستيك والاسكالوب والشوي.

5# وش الفخدة

لحمتها ناشفة شوية لكن ممتازة جدا في التسبيك والطبخ مع الخضار، وطعمها قريب شوية من لحمة الكتف ومناسبة للسلق زيها.



6# الموزة

لحمة الموزة دهونها قليلة لكن فيها أنسجة كتير بتخليها مناسبة أكتر للطبيخ والتسبيك وكباب الحلة والطواجن والتحمير في الفرن.

7# هبرة البطن

الجنب أو هبرة البطن لحمتها طعمها حلو ومميز عشان كده مناسب جدا للـ ستيك. لكن لازم نحرص إن شرايح اللحمة تكون رفيعة عشان تستوي كويس ونقدر نمضغها بسهولة.

8# الصدر

لحمة الصدر فيها نسبة دهون عالية، عشان كده هي مناسبة للفرم أو عمل الطواجن الدسمة.
شوفوا كمان 6 حاجات غلط بتعملوهم مع اللحمة!