in

أغرب 8 أكلات من الدول المشاركة في كاس أمم أفريقيا

أغرب 8 أكلات من الدول المشاركة في كاس أمم أفريقيا

قارة واحدة لكن فرق الثقافات فيها مش معقول! الأكلات التقليدية لمعظم الدول الأفريقية غريبة جدا لكن واضح إنها مفيدة لصحة اللاعيبة. ممكن تجربوا حاجة فيهم؟

1# الكونغو – “ليبوكي”

أكلة “ليبوكي”من أشهر الأكلات الشعبية في الكونغو، بيلفوا السمك والبصل والطماطم في ورق موز ويطبخوهم سوا. واحنا اللي فاكرين محشي ورق العنب اختراع!

2# زيمبابوي – “دود موبان”

قبل ما نتخض من الصورة، لازم نعرف إن دود موبان من أكتر الأكلات الشعبية المحبوبة في زيمبابوي! السكان بيقولوا إن طعمه حلو جدا ومقرمش سواء لما يتقلي أو لما يتحط في أي يخنة. الأكلة دي مغذية جدا وفيها نسبة بروتين أعلى من اللحمة!


3# أوغندا – “كاتوجو”

الفاصوليا الحمرا باللحمة والموز من أشهر الأكلات الأفريقية عموما لكن في أوغندا خصوصا ليها شعبية كبيرة! “كاتوجو” هي وجبة فطار دسمة ومغذية جدا فيها خضار مقلي مع شرايح الموز الأخضر والفاصوليا واللحمة. فطار أبطال!

4# جنوب أفريقيا – “سندوتش أناناس”!

أكتر بلد عندها اطباق غريبة! حبينا نبعد عن الأكل اللي فيه حشرات أو سمك مخلل أو لحمة مجففة وغيرهم، ونشوف أكلة محدش بيختلف عليها هناك،  سندوتش الأناناس في جنوب أفريقيا أكلة محبوبة جدا وبيتفننوا دايما يضيفوا للسندوتش نكهات مختلفة سواء حلو أو حادق!

5# أنجولا – “سمك كالولو”

سمك كالولو من أشهر الأكلات التقليدية في أنجولا، وجبة مكونة من السمك المجفف معمول في شوربة مع الخضار وزيت النخيل وخلطة توابل مميزة. عادةً بياكلوا جنبه أكلة اسمها فنجي، شبه البطاطس المهروسة. باختصار طبق غريب لكن واضح إنه صحي بامتياز!



6# تونس – “لبلابي”

ما نسيناش الدول العربية الأفريقية، تونس عندها شوربة حمص غريبة جدا اسمها اللبلابي. الغريب في الشوربة دي إنها مش حمص بس، بيتحط فيها عيش ناشف وتونة وبيض مسلوق أو مقلي على الوش، غير التوابل وزيت الزيتون والهريسة. مكونات صعب نتخيلها كلها في طبق واحد لكن اللبلابي محبوب جدا في تونس وفوايده الصحية كتيرة جدا!

7# المغرب – شوربة حلزون “الببوش”

الأغرب من شوربة التونة، شوربة حلزون! الببوش أكلة شعبية معروفة في المغرب ومحبوبا جدا، خصوصا في الشتا. الشوربة بتتعمل بالحلزون المتبل مع مجموعة أعشاب زي الزعتر والنعناع البري وورق اللورا وإكليل الجبل وغيرهم، وبتتقدم مع خلل سنان عشان تستخدم في أكل الحلزون من القوقعة. قيمته الغذائية ماتتفوتش فعلا!

8# الجزائر – “المفشش في حِجر إمه”

“المفشش في حِجر إمه” من أشهر الأكلات التقليدية في الجزاير. اسم الطبق باللهجة الجزائرية معناه “المدلل في حجر إمه” واتسمى كده بسبب شكل البيض المسلوق في اللحمة اللي شبه الطفل في حجر أمه! الوجبة فيها جرعة بروتين مش طبيعية!