in

أسوأ 10 حجج في الدايت

دايماً بنخترع حجج وأعذار عشان ما نكملش الدايت أو ما نبدأش دايت أصلاً. بس الحقيقة إن أغلبية الأعذار دي بتبقى هروب مش مبرر حقيقي! شوفوا معانا أشهر 10 حجج بنقولها هروباً من الدايت وليه لازم نتجاهلها!

1# الدايت غالي أوي

ناس كتير بتقول إن الدايت والأكل الصحي مكلفين جدا، مع إن الأكل الصحي ممكن يبقى موفر زي الوجبات السريعة والأكل المعتاد. مثلا لو استبدلنا الشوكولاتة أو كيس الشيبسي بتفاحة هنكون بناكل أكل صحي وبنوفر فلوس كمان! لوعايزين نخس بأقل تكلفة، نقدر نبدأ بتقليل كمية الأكل في الوجبات ونبدل الرمرمة بالفاكهة والخضار والبقوليات.

2# معنديش وقت

معظمنا عايش في مشاغل وضغوط كتيرة بين الشغل والبيت والحياة الاجتماعية، بس ده مش مبرر عشان نهرب من الدايت! إننا نستبدل كيس الشيبسي بمكسرات أو فاكهة مش حياخد مننا أي وقت! وإننا نعمل سلطة وخضار بدل ما نعمل أكل دسم ممكن يوفرلنا وقت أكتر. حتى لو فعلاً مفيش وقت ولازم نطلب أكل، في إختيارات صحية كتير!

3# يومي وحش ومزاجي أوحش

ممكن نبقى مضغوطين في الشغل أو نتعرض لأي موقف وحش يقفل لنا اليوم ويضايقنا ونحس إن لو كلنا حاجة دسمة ولذيذة دلوقتي هي اللي هتعدل المزاج مش كده؟ بس هي في الحقيقة ولا هتعدل مزاجنا ولا هتخلينا أحسن، بالعكس هي في الغالب حتحسسنا بالتقل والذنب اللي حيخلينا بعدها نتضايق ونحبط أكتر! لو عارفين ان مزاجنا بيتحكم في أكلنا، لازم نلاقي حلول بديلة نتعامل بيها لما يكون مزاجنا وحش، زي إننا نلعب رياضة بنحبها أو نتكلم مع حد من صحابنا أو نتفرج على فيلم بنحبه.

4# أنا أستاهل مكافأة

عكس الأكّيل العاطفي اللي بيجري على الأكل لما يتضايق أو يتوتر، هنلاقي الأكّيل المحتفل، الناس اللي بتحب تكافئ نفسها بعد تعب الجيم أو عشان اشتغلت كويس أو حتى عشان خست شوية الأسبوع ده. “طب يعني الواحد ما يكافئش نفسه؟” لأ طبعا احنا نستاهل مكافأة وحاجة حلوة اه بس مش لازم الحاجة الحلوة دي تكون أكل حيضُرنا! بدل ما نعاقب جسمنا بأكل مش صحي وكالوريز على الفاضي، ممكن نكافئ نفسنا بجلسة استجمام أو خروجة حلوة من غير ما يكون أول تفكرينا في الحلويات والبيبسي.


5# دي وراثة

طبعا لما نقول إن زيادة وزننا وراثة وكلها جينات هيبقى عندنا حجة جاهزة عشان نهرب من الدايت “هاعمل دايت ليه وأنا كده كده جيناتي هتخليني عندي كرش أو دهون متخزنة؟” بالرغم إن الجينات تقدر تحدد أماكن تخزين الدهون وسهولة تراكمها في الجسم أو حرقها، مش معناه إننا مالناش يد في الموضوع. الحقيقة إن معظم الأبحاث لقت إن التمارين المنتظمة والأكل الصحي بيغلبوا تأثير “جينات التخن” على الجسم. حتى لو التُخن وراثة، نقدر نعالجه ونتغلب عليه بنظام أكل وتمارين كويس.

6# الدايت مابيمشيش معايا

واحدة من أكتر الحجج المنتشرة وأكترها دلع برضه، إن “الدايت مابيمشيش معايا”. مش يمكن الفكرة دي هي اللي بتخليه مش ماشي معانا؟ يعني ممكن يكون الدايت بيحسس ناس بالضعف، أو الحرمان أو بيجيلهم إحباط عشان مابيلاقوش نتيجة. في الغالب ده عشان إحنا بنعمل دايت غلط! أنظمة الدايت التريندي في الغالب ولا هتدينا نتيجة ولا هتشجعنا اننا نكمل. الصح اننا ما نمشيش ورا التريند ودايت معقد وصعب عشان نخس بسرعة، نمشي على نظام صحي ومتوازن مناسب لينا ونديله وقته قبل ما ندور على النتايج.

7# أصل أنا حرقي بطيء

ناس كتير بتحجج إنهم مابيخسوش عشان معدل الحرق عندهم بطيء. حتى لو معدل الحرق عندنا بطيء فأكيد آخر حاجة هيحتاجها الجسم اننا نحمّله كميات كبيرة من الكالوريز والدهون عشان يحرقها. ده غير ان معدل حرق الدهون مش ثابت زي ما ناس كتير فاكرة، يعني الرياضة المنتظمة وتربية العضلات تقدر تعلّي معدلات الحرق في الجسم. ده غير إن كل ما كان الجسم محتاج يخس أكتر كل ما كان أسهل انه يحرق الدهون.

8# هابدأ دايت من بكرة

الحجة اللي بتخلينا ماننفذش أي قرار! لو هنقرر دايما نبدأ بكرة عشان غلطنا النهاردة يبقى عمرنا ما هنبدأ. نفس الحجة اللي بنأجل بيها الدايت لبعد الأعياد أو المناسبات اللي فيها أكل كتير. الصح نمشي على نظام صحي من دلوقتي عشان لما العيد أو المناسبة تيجي نقدر نخرج عن الدايت بتاعنا شوية. ونعرف إننا لو ضعفنا قدام حتة كيكة مثلا نقدر بعدها نكمل الدايت مش نخسر مجهودنا ونبطل دايت عشان أكلنا حاجة غلط!

9# أنا بحب الأكل بزيادة

الدايت بيضايقنا وبيحرمنا من متعة الاكل؟ يمكن احنا فاهمين الدايت غلط! . الدايت مش لازم يكون ممل وصعب زي ما الناس فاكرة، لو نظمنا نفسنا نقدر ناكل كل اللي بنحبه ونكون برضه ماشيين على دايت صحي. ممكن نمشي بقاعدة ال80/20، يعني ناكل أكل صحي بنسبة 80% من الوقت وناكل في ال20% الباقيين الأكل العادي اللي بنحبه. مع العلم اننا لو دورنا هنلاقي أكل صحي كتير نقدر نتبسط بيه من غير ما نحس انه أكل دايت تقيل على قلبنا.

10# مش عايزين نبقى شبه العصاية

الدايت مش هدفه اننا نكون رفيعين زيادة عن اللزوم أو نحاول نوصل لشكل جسم معين. المفروض هدفنا يكون اننا نوصل للوزن الصحي لجسمنا ونبعد عن الاكل المضر اللي بيهدد صحتنا قبل ما يكون بيهدد شكل الجسم.