تسالي

وظائف مابتشوفهاش غير فى رمضان

فى شوية شغلانات كده مش بنسمع عنها غير فى رمضان بس وبتختفى بعد رمضان وفى شغلانات تانية بتكون موجودة قبل رمضان لكنها بتنتشر وبتزيد اوي فى رمضان زي بياع الفول وبياع الطرشي.

المسحراتى:

وظيفة حصرية فى رمضان بس وكان بلال بن رباح وابن ام كلثوم هما اول ناس اشتغلوا الشغلانة دي وكان اول لما بلال يأذن الناس تتسحر واول ما ابن ام كلثوم يبطل اكل الناس تبطل اكل واول واحد نادى نداء السحورفى مصر كان “عنبسة بن اسحاق” سنة 228هجرية ,ودلوقتي مفيش شارع فى مصر مافيهوش مسحراتي وارتبط رمضان بالمسحراتي ارتباط كبير.

الكنفانى:

الكنافة نوع من الحلويات المشهورة فى مصر وبلاد الشام وأصل الكنافة يرجع للدولة العثمانية وكان اسمها زمان “تشنافة” او لون البلبل,والكنافة بتتباع عندنا فى مصر طول السنة عادي لكن بياع الكنافة وهو واقف على عربية الكنافة وبيلف العجينة مشهد ليه طعم تاني ماتحسش بيه غير لو شفته فى رمضان.

بياع الفول:

عربية الفول بتبقى موجودة طول السنة وفى كل حتة فى مصر عادي لكن فى رمضان بيكون الاقبال عليها اضعاف اضعاف الاقبال فى الايام العادية وطبعا الكلام ده بيكون فى اوقات السحور لان السحور فى رمضان مرتبط بالفول.

بياع العرقسوس:

مهنة مصرية اصيلة بتنتشر بشكل كبير فى رمضان وبياع العرقسوس بيشيل معاه ابريق نحاس كبير اتعمل مخصوص علشان يحافظ على بروده العرقسوس وبيكون رابط الابريق ده بحزام جلد نازل منه كوبايات وماسك صاجات عمال يعزف بيها وهو بيقول “ياعرقسوس شفا وخمير وتهني العطشان”.

بياع الفوانيس:

فى كام محل كده عندنا فى المنطقة بيبقوا قافلين طول السنة وبيفتحوا فى رمضان علشان تتباع فيهم فوانيس رمضان النحاس ام شمعة من جوه دي وبالرغم من ان الفوانيس دي قلت بشكل كبير وجت مكانها فوانيس كرمبو والفوانيس اللي بتغني الا ان بياع الفوانيس النحاس هيفضل جزء اساسي مايحلاش رمضان الا بيه.

شير