حلويات دليل المطاعم

نولا كب كيكس / Nola Cupcakes

 

النوع :  حلويات

التليفون: ٠٢٢٣٨٠٣٩٤٩

العناوين  : المعادي :  ٨٤ شارع ٩

الموقع: http://www.nolabakery.com/home.aspx

 معلومات عن المطعم: أول ما تدخل نولا هـ تحس أنك رجعت طفل صغير. رائحة العيش الطازة وألوان المعروضات هـ تصحى كل حواسك، ومستحيل على إنسان أنه يقاوم الشعور بالإثارة في مكان زي ده. أطباق صينى مزخرفة بـ تزين الحائط، وكاونتر من الخشب الغامق والزجاج بـ يحسسك أن المحل واسع، وممكن يكون مستوحى من محلات  فورتنم وميسون العتيقة فى لندن.

الموظفين لابسين زى موحد لونه أسود مع كاب عليه شعار نولا. هـ يقدمولك أى مساعدة تحتاجها وعندهم صبر أنهم يشرحولك كل الأسامى و النكهات، ولو كان حظك حلو، هـ تدوق عينة بـ بلاش من آخر ابتكاراتهم.

 الكيكات المتغطية بآيسينج متنوع بدءاً من كب كيك red velvet  الشهيرة، المكونة من كريمة الجبنة على قاعدة غنية بالطعم، وكمان cookie dough اللى بـ يكون عليها من فوق قطعة كوكيز كاملة متكسرة. إختراعات ثانية زى نوتيللا تويكس، تيراميسو، وأنواع ثانية هـ  تخليك مش قادر تمسك نفسك. الأسعار بـ تبدأ من 8.5 لـ 13 جنيه للكيكة وبـ تيجى فى علب شيك مرسوم عليها أشكال خزفية، تنفع قوى للهدايا.

كل كيكة بـ تكون خفيفة وطرية وفيها كمية كريمة “آيسينج” مظبوطة على الوش أو طبقة من الزبدة. لكن الطبقة اللى على  cookie dough كانت مسكّرة زيادة، الأحسن كان السطح الغنى بالكريمة لـ red velvet وطبقة الفاكهة على كب كيكس البلوبيرى. علشان تجرب حاجه ممتعة، جرب نكهة زبدة الشوكولاتة بالسودانى، بـ قوامها الخفيف الأسفنجى مع خليط من نكهات مختلفة هـ تضمنلك أن حاسة التذوق عندك تبقى صاحية.

لو بـ تعانى من الحساسية جرب التشكيلة اللى مافيهاش مكونات تسبب الحساسية. نولا كمان بـ يدعم قضايا محلية عن طريق التبرع بكل عائد مجموعة من الكب كيكس لـ عمل أو مشروع خيرى.

نولا يعتبر بوتيك بـ يبيع كب كيكس وعنده توصيل الطلبات لو حاسس أنك كسلان. يعتبروا كمان هدايا ممتازة حجمها صغير كفاية أنها تبسطك من غير إسراف. لكن فى الوقت اللى بـ نكتب فيه الكلام ده، الحاجة الوحيدة اللى ناقصة فرع المعادى كان مكان للقعدة، ودى حاجة مهمة لو عايز تستمتع بـ حلوياتك مع كوباية شاى.

كلمات دلالية
شير